Rundunar ‘yansandan Jihar Bauchi ta tabbatar da mutuwar wani yaro mai shekaru 13 a duniya, Mubarak Mohd, sakamakon ɗanna kunamar wata bindiga ƙirar gida (Dane) wa kansa da kansa a ƙauyen Udubo, karamar hukumar Gamawa ta jihar.
A cewar rundunar, lamarin ya faru ne a ranar 5 ga Satumba, 2026, lokacin da wani mafarauci mai shekaru 35, Suleiman Hamza, wanda ke zaune a ƙauyen, ya dawo daga farauta, inda ake zargin ya yi sakacin barin bindigar shaƙe da harsashi a cikin ɗakinsa tare da yin fitarsa.
’Yansandan sun ce daga bisani Mubarak ya shiga ɗakin, inda ake zargin ya ja kunamar bindigar, lamarin da ya sa ta tashi ta kuma ji masa mummunan rauni da ya yi sanadin mutuwarsa.
A cikin wata sanarwa da kakakin rundunar, SP Nafiu Habib, ya fitar ranar Lahadi, ya ce bayan samun rahoton lamarin, jami’an bincike na sashen ’yansanda na Gamawa sun gaggauta zuwa wurin da abin ya faru tare da fara gudanar da binciken farko.
Ya ce an garzaya da yaron zuwa babban asibitin Gamawa, inda likitan da ke bakin aiki ya tabbatar da mutuwarsa.Sanarwar ta ce, “An ɗauki hotunan gawar, sannan aka miƙa ta ga ’yanuwansa domin mata jana’iza da biso bisa tsarin addinin Musulunci.”
Rundunar ta ƙara da cewa an kama wanda ake zargi, daga bisani an miƙa kes ɗin zuwa sashen binciken manyan laifuka na rundunar (SCID) domin gudanar da cikakken bincike.
A wani labarin kuma, rundunar ta ce jami’anta sun daƙile wani yunƙurin fashi da makami a kan hanyar Kajala-Kere, da ke wajen garin Burra, tare da kwato babura biyu da ake zargin ‘yan fashin sun sace.
SP Habib ya ce a ranar 5 ga Satumba, ’yansanda sun samu rahoto daga jami’in da ke kula da ofishin ’yansanda na Kajala cewa wasu ’yan bindiga da ba a san ko su wanene ba, ɗauke da adduna da sanduna, sun tare hanyar Kajala-Kere.
Ya ce waɗanda ake zargin sun kwace babura ƙirar Bajaj guda biyu, wayoyin Android guda biyu da kuma power bank daga hannun Ado da wasu mazauna ƙauyen Kere guda uku.Bayan samun rahoton, an hado kan jami’an ’yansanda daga sashen Burra da jami’an sa-kai na yankin, inda aka gaggauta tura su wurin da lamarin ya faru.
A cewarsa, waɗanda ake zargin sun tsere ne bayan ganin jami’an tsaro, inda suka bar baburan da suka sace, tare da daƙile yunƙurin ci gaba da fashin.Jami’an sun kwato baburan, sannan suka binciki dazuzzukan da ke kewaye da wurin domin ƙoƙarin cafke waɗanda suka tsere.
Kwamishinan ‘yansandan Jihar Bauchi, CP Sani-Omolori Aliyu, ya yaba wa jami’an da suka mayar da tunƙari ‘yan fashin cikin gaggawa, wanda ya ce hakan ya taimaka wajen daƙile fashin.
Sai dai kwamishinan ya bayyana damuwarsa kan mutuwar yaron da ya harbi kansa a Gamawa, inda ya gargaɗi mafarauta da sauran masu mallakar bindigogi da su riƙa kula da makamai sosai tare da tabbatar da cewa an ajiye bindigogi a wuraren da yara ba za su iya isa gare su ba.
Kwamishinan ya kuma buƙaci mazauna jihar da su ci gaba da bai wa ’yansanda sahihan bayanai cikin lokaci, yana mai tabbatar wa jama’a cewa rundunar za ta ci gaba da kokarin kare rayuka da dukiyoyin al’umma a faɗin jihar.
