Ƙungiyar Kwankwasiyya ta nuna matuƙar damuwa tare da yin watsi da shirin Gwamnatin Jihar Kano na tilasta wa ƙananan hukumomin jihar 44 karɓar rancen kuɗi da ya kai kimanin Naira biliyan 55 daga wani banki.
Kakakin ƙungiyar, Dokta Habibu Saleh Mohammed, ne ya bayyana hakan a cikin wata sanarwa da ya fitar a birnin Kano a ranar Talata, 20 ga watan Oktoba, 2026, inda ya buƙaci a tabbatar da gaskiya, da riƙon amana, da bin doka kafin ɗaukar wannan mataki.
A cewar ƙungiyar, bayanan da ke ƙasa sun nuna cewa ana son kowace ƙaramar hukuma ta karɓi bashin kusan Naira biliyan 1.3, wanda aka tsara kashe Naira miliyan 632.57 wajen gina cibiyoyin jarrabawar kwamfuta (CBT), Naira miliyan 117.41 don shirin tallafawa al’umma, da kuma Naira miliyan 500 don wani aiki da ba a bayyana sunansa ba.
Kwankwasiyya ta buƙaci cikakken bayani kan inda za a kafa waɗannan cibiyoyi, da sunan wanda ya yi ƙididdigar kuɗaɗen, da kuma bayanin ainihin aikin da aka keɓe wa Naira miliyan 500 ba tare da sanar da al’umma ba.
Dokta Mohammed ya kuma soki lokacin da aka zaɓa domin ciyo wannan rance, yana mai nuni da cewa gabatowar kakar zaɓe ya sa batun ke haifar da shakku kan yiwuwar karkatar da kuɗaɗen zuwa harkokin siyasa.
Ya ƙalubalanci gwamnatin jihar kan dalilin da zai sa a tilasta wa ƙananan hukumomi karɓar wannan babban bashi domin ayyukan da gwamnatin jihar za ta tafiyar da kanta, maimakon barin ciyamomin su tsara abubuwan da suka fi muhimmanci ga yankunansu da kuma amfani da kason kuɗaɗen da suke karɓa daga asusun tarayya.
Haka kuma, ƙungiyar ta buƙaci a fitar da cikakken lissafin kuɗaɗen da ƙananan hukumomin suka bayar a can baya a ƙarƙashin shirin haɗin gwiwa na tallafa wa mata na wata-wata, wanda aka dakatar bai kai wata goma yana aiki ba.
Ta gargaɗi cewa bai kamata a tilasta wa wani shugaban ƙaramar hukuma sanya hannu a kan wani nauyin bashi mai girman gaske ba tare da ya fahimci dukkan ƙa’idojin shari’a da illar da hakan zai haifar ga tattalin arziƙin al’ummarsa ba.
