Rundunar ‘yansandan Jihar Adamawa, ta cafke wasu mutane biyu Ezekiel Kefas, mai shekaru 67 da Stephen Zabadi, mai shekaru 44 mazauna Wamsa Suwa, a ƙaramar hukumar Lamurde, kan zargin kashe wani ɗansanda mai suna Ibrahim Maizabuwa.
Kakakin rundunar ’yansandan jihar, SP Suleiman Yahaya Nguroje, wanda ya tabbatar da kama waɗanda ake zargin a ranar 19 ga watan Nuwambar 2024, ya ce yayin bincike sun gano cewa marigayin da aka kashe ɗansanda ne da ke aiki a Jihar Gombe.
- EFCC Ta Gurfanar Da Yahaya Bello A Kotu
- ‘Yansanda Sun Ceto Fasinjoji 14 Daga Hannun ‘Yan Bindiga A Katsina
Ya ce lamarin ya faru ne lokacin da marigayin ya ziyarci gidan abokinsa Ezekiel Kefas, inda ya fara farfasa kayayyaki ciki har da tukwane tare da cin zarafin jama’a wanda hakan ya tayar da hargitsi tare da jawo ‘yan daba suka lakaɗa masa duka har lahira.
SP Ngurori, ya ce ɗan marigayin mai suna Danlami Ibrahim Maizabuwa, wanda ɗan asalin Jihar Gombe ne, ya shigar da ƙara a ofishin ‘yansandan Jihar Adamawa.
Kakakin ‘yansandan ya ƙara da cewa Kwamishinan ‘yansandan jihar, Morris Dankombo, ya bayar da umarnin zurfafa bincike tare da gurfanar da waɗanda ake zargin domin su girbi abin da suka shuka.
