Gwamnatin Tarayya ta ayyana Alhamis, 1 ga Oktoba, 2026, a matsayin ranar hutu ta ƙasa domin bikin cika shekaru 66 da Nijeriya ta samu ’yancin kai.
A cikin wata sanarwa, Babbar Sakatariyar Ma’aikatar Harkokin Cikin Gida, Dakta Magdalene Ajani, ta ce Ministan Harkokin Cikin Gida, Olubunmi Tunji-Ojo, ya taya ’yan Nijeriya da ke gida da ƙasashen waje murnar bikin.
Ministan ya buƙaci ’yan Nijeriya su ci gaba da tabbatar da haɗin kai, kishin ƙasa, zaman lafiya da mutunta juna, yana mai jaddada cewa zaman lafiya da kwanciyar hankali na da matuƙar muhimmanci ga ci gaban ƙasa.
Ya bayyana bambancin al’adu da ɗabi’un Nijeriya a matsayin wata dama da ƙasar ke da ita, tare da kira ga ’yan ƙasa da su yi koyi da kishin ƙasa da iyayen da suka kafa Nijeriya suka nuna, wajen gina ƙasar da al’ummomin da za su zo nan gaba za su yi alfahari da ita.
Ministan ya kuma sake jaddada ƙudirin Gwamnatin Tarayya na inganta tsaron ƙasa, harkokin lafiyar da samar da yanayin da zai bai wa ’yan Nijeriya damar rayuwa, aiki da kuma neman halal ɗinsu cikin kwanciyar hankali da ƙarfin gwiwa.
