Jam’iyyar African Action Congress (AAC) ta nemi izinin Shugaban Ƙasa Bola Tinubu domin gudanar da bikin ƙaddamar da kwamitin yaƙin neman zaɓen ɗan takararta na shugaban ƙasa, Omoyele Sowore, a Fadar Aso Rock da ke Abuja.
A cikin wasiƙar da ta aike wa shugaban ƙasar mai kwanan wata 21 ga Oktoba, 2026, jam’iyyar ta nemi a gudanar da bikin a ranar 11 ga Nuwamba, 2026.
AAC ta kuma buƙaci gwamnati ta samar da abinci, abubuwan sha, tallafin sufuri da sauran kayan gudanarwa ga mahalarta 5,000 da ake sa ran za su halarci taron daga sassan Nijeriya da ƙasashen waje.
Wasiƙar, wadda Sakataren Ƙasa na jam’iyyar, Oshiokhue Philip Ikpeminoghena, ya sanya wa hannu, ta ce buƙatar ta samo asali ne daga tsarin dimokuraɗiyya mai jam’iyyu da dama, da kuma buƙatar tabbatar da adalci da daidaito ga dukkan jam’iyyun siyasa.
Jam’iyyar ta yi ikirarin cewa an taɓa gudanar da irin waɗannan shirye-shirye ga jam’iyyar APC mai mulki, don haka ta buƙaci a yi wa sauran jam’iyyu irin wannan adalci.
Ta kuma jaddada cewa cibiyoyin gwamnati na jama’a ne, bai kamata a yi amfani da su wajen fifita wata jam’iyya ko nuna bambanci ga wasu ba.
Sai dai, har yanzu ba a tabbatar da cewa gwamnatin Tinubu ta amince da buƙatun AAC ba.
