Ministan Babban Birnin Tarayya, Nyesom Wike, ya ce zai yi murabus daga muƙaminsa idan Shugaba Bola Tinubu ya faɗi zaɓe a Abuja ko Jihar Ribas a zaɓen shugaban ƙasa na 2027.
Wike ya bayyana hakan ne yayin da yake magana da ƙungiyar ’yan kasuwar Apo a Abuja.
Ya ce goyon bayan Tinubu ya wuce iyakokin jam’iyyu, yana mai cewa wasu ’yan Jam’iyyar PDP ma suna goyon bayan shugaban ƙasar.
Wike ya ce Abuja ita ce inda yake aiki, yayin da Ribas kuma jiharsa ce ta asali, don haka zai ɗauki alhakin sakamakon zaɓen idan Tinubu bai samu nasara a wuraren biyu ba.
“Ni mutum ne mai aiki da gaskiya. Za a gudanar da zaɓen shugaban ƙasa ranar 16 ga watan Janairu, 2027.
“Idan Shugaban Ƙasa ya faɗi a Ribas da Abuja, zuwa ranar 17 ga watan Janairu, 2027, zan sanar da murabus ɗina daga muƙamin Ministan Babban Birnin Tarayya,” in ji Wike.
