Mamallakin Ƙungiyar Ƙwallon Ƙafa ta Manchester City, Sheikh Mansour zai iya sayar da kungiyar matukar bai yi nasara a karar da ya daukaka kan hukuncin da aka yanke wa kungiyar dake buga gasar Premier League ba.
Hasaahen ya fito ne daga bakin kwararre, mai sharhi akan wasanni, Christopher Davidson, a yayin da yake magana a wata hira da jaridar ‘The Athletic’, inda ya ce, “Attajirin na Abu Dhabi ba zai so ya cigaba da shugabantar wata kungiyar dake da mummunan tabo da ya danganci cin hanci da rashawa ba”.
Idan ba’a manta ba, a makon da ya gabata, wani kwamiti mai zaman kansa ya sami Manchester City da laifin da ya shafi keta dokokin kudi na tsawon kakar wasanni 9 tun daga zangon wasa na shekarar 2009/10 zuwa 2017/18.
Kwamitin ya gano cewa, City ta gudanar da ɓoyayyun hada-hadar kudi wanda ya kara mata samun kudaden shiga, yayin da kuma ta sami kungiyar da laifin rashin bayar da hadin kai wajen binciken da hukumar ta gudanar.
Tunda farko dai Manchester City ta musanta aikata ba daidai ba, inda kuma ta daukaka kara a kan hukuncin, tana mai cewa binciken da kwamitin ya gudanar na cike da kurakurai, amma kuma Davidson yace ba lallai bane daukaka karar da Manchester City tayi yayi nasara, amma kuma shugaban kungiyar Al Mubarak ya bayyana a watan Yuni cewa Manchester City ba ta sayarawa bace duk da kalubalen da take fuskanta.
