Amurka ta kammala janye dukkan dakarunta na soji daga ƙasar Iraki, kamar yadda Ministan Harkokin Wajen Iraki, Fuad Hussein, ya bayyana a ranar Litinin.
Hussein ya ce dakarun Amurkan sun fice gaba ɗaya daga ƙasar Iraki bisa yarjejeniyar da aka cimma tsakanin Bagadaza da Washington.
Sanarwar ta zo ne kwanaki biyu kafin wa’adin 30 ga Satumba da aka tsara tun farko domin kammala janye sauran dakarun Amurka da kuma kawo ƙarshen aikin soji na ƙawancen ƙasashen duniya da Amurka ke jagoranta a Iraki.
Amurka da Iraki sun cimma yarjejeniya a shekarar 2024 ta fara kawo ƙarshen aikin sojin da Amurka ke jagoranta wajen yaƙi da ƙungiyar ISIS.
Kamfanin Dillancin Labaran Associated Press (AP) ya ruwaito a watan Agusta cewa sojojin Amurka na kan hanyar kammala janye dukkan dakarunsu daga Iraki kafin ƙarshen watan Satumba, lamarin da zai kawo ƙarshen kasancewar sojojin Amurka a ƙasar tun bayan mamayar da aka fara a shekarar 2003.
