An bude taron gyare-gyaren manufar karbar korafe-korafe, da magance matsaloli nan take na Beijing na shekarar nan ta 2026 a birnin Beijing, wanda cibiyar nazarin zamantakewa ta Sin, da babban rukunin gidan radiyo da talabijin na kasar Sin CMG, da kwamitin jam’iyyar kwaminis ta Sin JKS ta birnin Beijing da gwamnatin birnin suka yi hadin gwiwar shiryawa.
Yin Li, mamban ofishin siyasa na kwamitin kolin jam’iyyar JKS, kana sakataren kwamitin jam’iyyar na birnin Beijing, ya halarci bikin bude taron ya kuma gabatar da jawabi. Kazalika, shi ma mataimakin darakta na sashen yayata ayyuka na kwamitin kolin JKS ta kasar Sin, kuma shugaban CMG Shen Haixiong ya gabatar da jawabi a yayin taron.
A nasa jawabin, Yin Li ya ce shugaban kasar Sin Xi Jinping, yana mayar da hankali sosai kan aikin birnin, ya kuma gabatar da ra’ayin samar da ci gaba dake sanya muradun jama’a a gaban komai, kana ya jadadda wajibcin gudanar da harkokin birnin bisa bukatun jama’a. Ban da hakan, ya ce dole ne a raya birni bisa hanyoyin fasaha na zamani, matakin dake ba da jagoranci a fannin kimiyya da fasaha ga ci gaban birni.
Yin ya kara da cewa, Beijing, a matsayinsa na babban birni na zamani mai cike da kuzari, tun daga shekarar 2019 ya kaddamar da tsarin karbar korafe-korafe, da magance matsaloli nan take bisa kirkire-kirkire, ta hanyar layin musamman na tarho na hidimar jama’a mai lamba “12345”, don karbar bukatun jama’a a duk sa’o’i 24, don magance kalubale da matsaloli na tafiyar da birnin, da amsa bukatun jama’a cikin gaggawa, kuma ya zuwa yanzu tsarin ya karbi bukatun jama’a iri daban-daban kusan miliyan 200.
A cikin jawabinsa, Shen Haixiong ya ce a shekarun baya-bayan nan, Beijing ya aiwatar da muhimman ra’ayoyin shugaba Xi na bautawa jama’a a harkokin birni, kuma ta hanyar kirkire-kirkire na zamani, ana gano bukatun jama’a na yau da kullum, da matsalolin gama gari daidai, kuma an magance matsaloli da amsa bukatun jama’a nan take yadda ya kamata.
Wannan shi ne ainihin matakin da Beijing ke dauka wajen biyan bukatun jama’a, da bautawa jama’a bisa fasahar AI da sauran fasahohi na zamani, ta yadda jama’ar birnin ke iya cin gajiyar hakan. (Amina Xu)
