Yau Litinin 22 ga watan Disamba ne aka gabatar da sabon daftarin kundin dokar kiyaye muhallin halittu, don a duba shi a zama na 19 na zaunannen kwamitin majalisar wakilan jama’ar kasar Sin karo na 14.
A ’yan shekarun nan, ana kara samun rikici tsakanin namun daji masu cin ciyayi da dabbobin gida, saboda kwace filayen ciyayi da ake kara yi, har ma manyan namun dajin suna kara zama barazana ga tsaron dan Adam a kasar Sin. Sabili da haka, sabon daftarin dokar ya tanadi cewa, a yankunan da matsalar namun daji ta yi kamari, ya dace gwamnatoci na sama da matsayin gunduma su tattaro hukumomi, da daidaikun mutane don kokarin shawo kan wannan matsala.
Kazalika, daftarin dokar ya ce, a lokacin da namun daji ke haifar da barazanar ba-zata ga tsaron dan Adam, idan dan Adam ya dauki matakin kare kansa da ka iya lahanta namun dajin, ba za a hukunta shi bisa doka ba.
Sabon daftarin dokar ya kuma jaddada ayyukan sa ido kan hukumomin sa ido ga muhallin halittu, da yadda ake jigilar abubuwan bola tsakanin larduna da jihohi, da kara tanajin tsumin ruwa a bangaren aikin gona, da inganta bukatun da suka shafi samar da ci gaba ba tare da gurbata muhalli ba. (Murtala Zhang)
