Gwamnatin Tarayya ta ba dukkan hukumomin kiwon lafiya, da sauran masu ruwa da tsaki umarnin gaggauta ƙara kaimi wajen fadakar da al’umma game da matakan kariya daga cutar Ebola. Wannan umarni na zuwa ne a matsayin wani ɓangare na ƙoƙarin dakile fargabar yaɗuwar cutar biyo bayan samun bullarta a Birnin Tarayya Abuja a wannan watan Oktoba na 2026.
Ministan Lafiya, Farfesa Muhammad Ali Pate, ya buƙaci hukumomin da abin ya shafa, ciki har da Hukumar Kula da Cututtuka Masu Yaɗuwa ta Ƙasa (NCDC) da Hukumar Wayar da Kan Jama’a ta Ƙasa (NOA), da su yaɗa gangamin wayar da kai zuwa dukkan matakai na al’umma.
An buƙaci hukumomin su mayar da hankali wajen amfani da kafafen yaɗa labarai na gargajiya da na zamani, makarantu, da kasuwanni, da tashoshin mota, da wuraren ibada domin sanar da jama’a alamomin farko na cutar da kuma muhimmancin tsaftar muhalli.
Bayanai sun nuna cewa gwamnatin ta ɗauki tsauraran matakai a mashigar ƙasar da filayen jiragen sama, ciki har da sanya aƙalla mutum 46 da suka yi mu’amala da wani jami’in diflomasiyya da ya kamu da cutar a cikin jerin waɗanda aka haramta wa yin balaguro na tsawon kwanaki 21 (no-fly list) domin sanya idanu a kansu. Gwamnati ta kuma buƙaci jihohi 15 da har yanzu ba su kammala tsara dabarun tunkarar cutar ba da su gaggauta yin hakan tare da haɗa gwiwa da cibiyoyin kiwon lafiya na matakin farko.
Mahukuntan sun yi kira ga ƴan Nijeriya da su kwantar da hankalinsu tare da guje wa yaɗa labaran ƙarya ko firgici a shafukan sada zumunta. Sun buƙaci jama’a da su riƙa tsaftace hannayensu akai-akai, su kauce wa taɓa mutanen da ke nuna alamun cutar, sannan su gaggauta sanar da jami’an lafiya ta lambobin waya na gaggawa idan suka ci karo da wani da ake zargi.
