Da safiyar yau Laraba ne aka gudanar da taron murnar cika shekaru 105 da kafuwar jam’iyyar kwaminis ta Sin a babban zauren taruwar jama’a na birnin Beijing. Babban sakataren JKS, kuma shugaban kasar, kana shugaban kwamitin soja na kwamitin tsakiyar JKS Xi Jinping, ya mika lambobin yabo na “The July 1st” ga wadanda suka cancanta, kana ya gabatar da muhimmin jawabi.
Shugaba Xi ya mika gaisuwa ga dukkanin ‘yan jam’iyyar kwaminis ta Sin JKS a madadin kwamitin tsakiyar. Ya kuma taya murna ga wadanda suka samu lambar yabo ta “The July 1st”, da kuma wadanda aka karrama a matsayin ‘yan jam’iyyar nagari na kasa, da ma’aikatan jam’iyyar nagari, da kwamitocin jam’iyyar nagari a wurare daban-daban.
Xi ya bayyana cewa, cikin shekaru 105 da suka gabata, jam’iyyar ta kasance rike da akida ta farko, da cika alkawarinta na mayar da muradun jama’a gaban komai, da farfado da al’ummar Sin, tare da jagorantar al’ummar kasa wajen gwagwarmaya ba tare da gajiyawa ba, inda suka kafa sabon babi mafi kyau a tarihin al’ummar Sin mai dubban shekaru.
Xi ya bayyana cewa, dalilin da ya sa jam’iyyar kwaminis ta Sin ta iya ci gaba da samun nasara a cikin shekaru 105 na gwagwarmaya da suka gabata, kuma dalilin da ya sa tarihi da jama’a suka zabe ta, shi ne halayenta masu kyau, wanda sauran jam’iyyun siyasa da karfin siyasa ba su da su.
Xi ya bukaci dukkan ‘yan jam’iyyar da su karfafa kwarin gwiwa, da ci gaba da gwagwarmaya, kuma da ci gaba da samar da sababbin nasarorin da suka dace da zamani da jama’a. (Amina Xu)
