A duniyar da ke cike da dimbin al’umma, samarwa da inganta hanyoyin sufuri, ba wai alfarma ba ce, abu ne da ya zama wajibi domin saukakawa al’umma zirga-zirga da inganta walwala da jin dadinsu. A gefe guda kuma hakan na taimakawa wajen bunkasa tattalin arzikin kasa.
Kasar Sin ta fahimci irin wannan muhimmanci da rawar da hanyoyin sufuri ke takawa a rayuwar yau da kulllum, musamman sufurin jirgin kasa, a don haka ta saka kaimi wajen ganin fannin ya inganta, ya kuma zama wani jigo wajen bunkasa tattalin arzikinta.
Makuden kudaden da kasar sin ke narkawa a fannin bunkasa hanyar sufurin jiragen kasa na zamani, babban abun a yaba ne, wanda hakan ya sa ta yi fice a duniya.
A makon da ya gabata rukunin kamfanin da ke kula da sufurin jiragen kasa na kasar Sin ya fitar da rohoton cewa, an kara gina adadin kilomita 1,625 na layin dogo wanda tuni ya fara aiki a watanni tara na farkon shekarar nan. A cewar rahoton, a watanni tara na farkon shekarar nan, fannin sufurin ya kammala aikin zuba jari da ya lakume kimanin Yuan biliyan 601.2 (kusan dalar Amurka biliyan 89) wanda ya dara na shekarar bara da kaso 1.3.
Idan aka waiwaya baya a karshen shekarar 2025, adadin tsawon layin da jirgin kasan ke bi ya kai kilomita 165,000 wanda ya hada da sama da kilimota 50,000 a layin jirgi mafi sauri.
Kazalika a wani rahoto na daban, an bayyana cewa, nan da shekarar 2035 aikin fadada hanyar jirgin kasa mai matukar gudu zai cimma adadin kilomita 70,000, da ya hada da layuka takwas a tsaye wato kudu zuwa arewa, da layuka takwas a gicciye da ya hada gabas da yamma.
Da zarar an kammala aikin, zai sada manyan biranen kasar da juna da kuma dada matso da biranen kusa, da kusanto da manyan yankunan tattalin arziki na kasar.Bukatar tafiye-tafiye ta jiragen kasa na daya daga cikin dalilan da ya sa kasar da ta kasance mafi karfin tattalin arziki ta biyu a duniya ke ci gaba da zuba jari a fannin.
Alkaluman sufurin jiragen kasa da kasar ta fitar ya nuna cewa, tafiye-tafiyen fasinjoji ya kara samun tagomashi a watanni tara na farkon shekarar nan, inda aka samu adadin tafiye-tafiye biliyan 3.71, wanda ya haura na shekarar bara da kaso 4.8 cikin dari.
A farkon wannan shekarar hukumar da ke kula da tsarin hanyoyin jiragen kasa ta kasar, ta fitar da wani shiri da zai kafa tsarin amfani da fasaha da kirkire-kirkire da zai jagoranci zamanantar da hanyar layin dogo nan da shekarar 2030. (Suleiman Suleiman)
