Kasar Sin ta bayyana cewa tana sa-ido sosai kan halin da ake ciki a yankunan Gabas ta Tsakiya, da Gulf, da Bahar Maliya, da kuma Kahon Afirka. Mai magana da yawun ma’aikatar harkokin wajen kasar, Guo Jiakun, ya bayyana a yau Talata cewa, nan ba da jimawa ba, kasar za ta tura wakilai na musamman don ziyartar kasashen da ke wadannan yankuna.
A wani taron manema labarai, Guo ya ce kasar Sin ta damu sosai game da tsawon lokacin da aka dauka ana gwabza fada da kuma tasirin da hakan ke yi, inda ya yi kira ga bangarorin da abin ya shafa da su warware sabanin da ke tsakaninsu ta hanyar shawarwari da tattaunawa, da kuma cimma yarjejeniyar tsagaita wuta mai dorewa tun da wuri.
Dangane da abin da aka ruwaito na cewa Tarayyar Turai na shirin daukar matakan kasuwanci don rage shigo da kayayyakin sinadarai, da kayan daki da injuna daga kasar Sin wanda ana iya aiwatar da su a shekara mai zuwa kuwa, da yake ba da amsa, Guo ya ce, kasar Sin a kodayaushe ta yi amannar cewa babban abin da yake da muhimmanci a alakar Sin da Tarayyar Turai shi ne hadin gwiwa, kuma ginshikin dangantakar tattalin arziki da cinikayya tsakanin Sin da Turai shi ne cin gajiyar juna da samun nasara ga kowane bangare. Yana fatan Tarayyar Turai za ta mutunta ka’idojin tattalin arziki na kasuwanci da gasa mai adalci, tare da guje wa amfani da hanyoyin warware takaddamar cinikayya ba bisa ka’ida ba.
A game da taron nune-nunen hotuna bisa cika shekaru 80 da fara shari’o’in Tokyo, da aka gudanar a hedkwatar MDD da ke birnin New York a ranar 26 ga watan Oktoban nan kuwa, Guo ya bayyana cewa shari’o’in na Tokyo suna da muhimmanci sosai a tarihi da kuma zamanin yau. Sun kasance wani muhimmin bangare na tsarin kasa da kasa da aka shimfida bayan yakin duniya na biyu. Kasar Sin a shirye take ta yi aiki da dukkan kasashe da mutanen da ke son zaman lafiya a duniya, wajen kare gaskiyar tarihi, da kuma kiyaye tsarin kasa da kasa da aka shimfida bayan yakin, tare da kare adalci da daidaito a matakin kasa da kasa. (Abdulrazaq Yahuza Jere)
