Hukumar kididdiga ta kasar Sin ko NBS, ta fitar da wasu alkaluma dake nuna yadda bunkasar samar da kayayyakin laturoni, da na manyan fasahohi suka taimaka wajen ingiza ribar da manyan masanaantun sashen suka samu, da sama da kaso 10 cikin watanni tara na farkon shekarar nan ta 2026.
Alkaluman da NBS ta fitar a yau Talata, sun nuna yadda ribar masanaantun sashen ta karu da kaso 15.5 bisa dari a mizanin shekara-shekara, wato ribar yuan tiriliyan 6.03, kwatankwacin dala biliyan 897.7 tsakanin watan Janairu zuwa Satumban bana, alkaluman da suka tabbatar da wanzuwar ci gaban sashen da kaso sama da 10 tun daga farkon shekarar nan ta bana. Har ila yau, NBS ta ce a watan Satumban da ya gabata kadai, ribar masanaantun ta karu da kaso 14.4 bisa dari a mizanin shekara-shekara.
Sashen cinikayyar kayayyakin laturoni ne kan gaba wajen ingiza ribar masanaantun, inda ribar ta ninka wadda suka samu a shekarar da ta gabata, tare da bayar da gudunmawar kason maki 9.6 bisa dari na ribar masanaantun. (Mai Fassara: Saminu Alhassan)
