Kwanan baya, ofishin jakadancin kasar Sin dake kasar Cape Verde ya shirya bikin murnar sabuwar shekarar gargajiyar Sinawa na shekarar 2026 mai taken “Maraba da zuwan sabuwar baraza, A yi murnar sabuwar shekara ta kasar Sin tare”. A yayin bikin, an nuna shirin talibijin na CMG na murnar sabuwar shekarar gargajiyar kasar Sin, domin mika sakon fatan alheri ga mahalarta.
Jakadan kasar Sin dake kasar Cape Verde Zhang Yang ya ba da jawabi cewa, a bana ake cika shekaru 50 da kafuwar huldar diflomasiyya a tsakanin kasar Sin da kasar Cape Verde, kuma kasashen biyu za su gudanar da biki domin ci gaba da zurfafa zumuncin dake tsakaninsu cikin wannan sabon zamani, tare da sa ran cimma karin sakamako bisa hadin gwiwar dake tsakaninsu a nan gaba. Ya kara da cewa, shekarar 2026 ita ce “shekarar musayar al’adu da cudanyar jama’a ta Sin da Afirka”, kuma kasar Sin tana fatan ci gaba da zurfafa dangantakar abokantaka bisa manyan tsare-tsare a tsakaninta da kasar Cape Verde, gami da inganta fahimtar juna a tsakanin al’ummomin kasashen biyu.
Ban da haka kuma, an nuna bidiyon na CMG a gun bikin murnar sabuwar shekarar gargajiyar Sinawa da aka yi a ofisoshin jakadancin kasar Sin dake kasashen Oman, da Sri Lanka, da kuma a yayin liyafar murnar sabuwar shekarar gargajiya ta Sin da Sinawan dake zaune a kasar Masar suka yi.
Haka zalika kuma, an nuna bidiyon a allunan manyan gine-gine sama da 17,000 dake biranen Hanoi, da Ho Chi Minh, da Da Nang, da dai sauran biranen kasar Vietnam. (Mai Fassara: Maryam Yang)
Discussion about this post