Tsohon Mataimakin Shugaban Ƙasa, Atiku Abubakar, ya buƙaci Majalisar Dattawa ta ƙi amincewa da buƙatar Shugaba Bola Ahmed Tinubu na karɓar bashi daga ƙasar waje na dala biliyan 20.52 da Yuro biliyan 1.045, har sai gwamnati ta bayyana cikakkun bayanai kan ayyukan da za a gudanar da kuɗin.
Atiku, wanda yake takarar shugaban ƙasa a ƙarƙashin jam’iyyar ADC, ya bayyana matsayinsa ne a cikin wata sanarwa da Daraktan Yaɗa Labarai na Kwamitin Yaƙin Neman Zaɓensa, Phrank Shaibu, ya fitar. Ya ce buƙatar da Tinubu ya gabatar wa Majalisar Dattawa ta tabbatar da gargaɗin da ya yi a ranar 12 ga Oktoba kan shirin karɓar bashin da ya kai dala biliyan 20.
Ya nuna damuwa kan yadda gwamnati ta lissafa fannoni da za a iya amfani da kuɗin a kansu, amma ba ta bayyana takamaiman ayyukan da za a aiwatar ba da kuɗin da kowanne zai ci, ko kuma wuraren da za a gudanar da su ko kamfanonin da za su yi aikin ba.
Atiku ya kuma yi tambaya kan ko wani ɓangare na bashin zai shafi aikin babbar hanyar Legas zuwa Kalaba, wadda aka sauya wasu sassan hanyarta zuwa kan tudu. Sai dai bai gabatar da hujjar da ta tabbatar da cewa za a karkatar da kuɗin bashin zuwa ga harkokin yaƙin neman zaɓe ba.
Atiku ya yi kira ga ƴn majalisar tarayya da kada su amince da ko da dala ɗaya daga cikin bashin, har sai gwamnati ta wallafa cikakkun bayanai kan ayyukan, da kwangiloli, da kuɗaɗen da za a kashe, da ma sunayen ƴan kwangila, da kuma sharuɗɗan bashin da yadda za a biya shi. Ya kuma ce idan aka zaɓe shi shugaban ƙasa, zai binciki dukkan basussukan da gwamnatin Tinubu ta karɓa, musamman waɗanda aka karɓa a shekarar ƙarshe ta mulkinta.
A nasa ɓangaren, Tinubu ya nemi amincewar Majalisar Dattawa da shirin karɓar bashin na shekarar kuɗi ta 2026–2027, yana mai cewa za a yi amfani da kuɗin ne wajen ayyukan more rayuwa da bunƙasa fannoni kamar wutar lantarki, da sufuri, da lafiya, da ilimi, da noma, da samar da ruwa da kuma tsaro.
Shugaban Majalisar Dattawa, Godswill Akpabio, ya miƙa buƙatar ga Kwamitin Majalisar kan Basussukan Cikin Gida da na Ƙasashen Waje domin bincike.
Ya zuwa lokacin rahoton, Majalisar Dattawa ba ta amince da buƙatar ba.
