An gudanar da bikin harshen Sinanci na MDD na 2026 da bikin harshen Sinanci na bidiyo karo na 6 na CMG ranar Juma’a a Geneva.
Bikin wanda babban rukunin gidajen rediyo da talabijin na kasar Sin CMG da tawagar dindindin ta kasar Sin a ofishin MDD da ke Geneva da ofishin MDD na Genevan suka shirya tare, ta hada baki sama da 350 daga kasashe sama da 30.
Cikin jawabin da ya yi ta bidiyo, shugaban CMG Shen Haixiong ya bayyana yadda harufan Sinanci ke zaman alama ta wayewar kan Sinawa, yana cewa kafar CMG za ta nace wajen inganta musayar al’adu ta hanyar fasaha da kirkire-kirkire.
A nata bangare, darakta janar ta ofishin MDD na Geneva Tatiana Valovaya, ta bayyana harshen Sinanci a matsayin muhimmiyar gadar da ta hada Sin da duniya, tana cewa yi wa bikin na bana taken “hikima” ya nuna burin bai daya na MDD.
Bikin ya kunshi wasu shirye shiryen tattaunawa kamar wanda aka yi wa lakabi da “Seeing Words as Faces” wanda matasa jami’an diplomasiyya da dalibai suka bayyana labaran da suka shafe su game da harufan Sinanci.
Su ma mahalarta sun more kallon shirye-shiryen al’adu na CMG da, salon rubuce-rubuce na gargajiya, da nune-nunen al’adun gargajiya, da mu’amalar da ta shafi fasahar AI. (Mai fassara: Fa’iza Mustapha)
