Gwamna Simon Lalong na Jihar Filato, ya bayyana kwarin gwiwar cewa jam’iyyar APC za ta yi nasara a zaben gwamna da na ‘yan majalisar jiha a jihar.
Gwamnan ya bayyana hakan ne a ranar Talata a Jos, yayin da yake zantawa da manema labarai a karshen ziyarar da ya kai wasu ayyuka da ke gudana a cikin birnin.
- An Gurfanar Da Wani Mutum A Kotu Kan Satar Akuya
- Ministar Buhari, Gbemi Saraki Ta Musanta Sauya Sheka Zuwa PDP
Ya ce jam’iyyar ta gudanar da ayyukanta ta hanyar yakin neman zabe a matakai daban-daban a jihar da kuma kasa, wanda ya kai ga samun nasara a zaben shugaban kasa.
Ya kara da cewa, “A wannan karon ranar Lahadi, APC za ta sake samar da wani gwamna a Jihar Filato.
Ya kuma bayyana fatansa cewa sabon zababben gwamnan zai ci gaba da gudanar da ayyukan alheri da ayyukan da gwamnatinsa ta bullo da su, domin ci gaban jihar.
Gwamnan ya kuma tabbatar wa da ma’aikatan gwamnati cewa ba zai bar albashin da ake biya ba kafin ya bar aiki.
“Mun biya watan Janairu, za mu biya Fabrairu kuma da yardar Allah ba zan ki biyan albashi ba,” in ji shi.
