Dakarun Sojin Nijeriya, tare da haɗin gwiwar jami’an Hukumar DSS, sun kama wani mutum da ake zargi da garkuwa da mutane yayin da yake ƙoƙarin karɓar kuɗin fansa daga wata mata a Jihar Nasarawa.
An kama wanda ake zargin, mai suna Mukaila Iliyasu, a yankin Akwaba da ke ƙaramar hukumar Eggon, yayin wani samame na haɗin gwiwa tsakanin sojojin Operation Whirl Stroke da jami’an DSS.
Kakakin yaɗa labarai na rundunar haɗin gwiwar, Laftanar Ahmad Zubairu Zubairu, ya ce an gudanar da samamen ne bayan samun bayanan sirri cewa wanda ake zargin ya yi barazanar sace matar idan ba ta biya shi kuɗi N200,000 ba.
Ya bayyana cewa jami’an DSS sun sanar da sojoji game da barazanar tun ranar 29 ga Oktoba, lamarin da ya sa aka shirya aikin cafke shi.
A yayin samamen, wani soja ya yi shigar farar hula don ɓadda kama, inda ya yi kamar shi ne mutumin da aka tura domin kai kuɗin fansar.
An kama wanda ake zargin ne a lokacin da yake karɓar kuɗin, inda jami’an tsaro suka ƙwato N200,000 da ake zargin kuɗin fansar ne.
Rundunar ta ce wannan aiki ya taimaka wajen hana yiwuwar sace matar. Tuni aka miƙa wanda ake zargin ga hukumar DSS domin ci gaba da bincike da kuma gurfanar da shi a gaban shari’a idan an kammala bincike.
