Malamin addinin Musulunci, Sheikh Ahmad Gumi, ya ce wasu ’yan bindigar da ya tattauna da su sun bayyana cewa suna ci gaba da kai hare-hare ne saboda ramuwar gayya da kuma tsoron ka da a kashe su idan suka ajiye makamansu.
A wata hira da ya yi da shirin PAPShow, Gumi ya ce ’yan bindigar ba sa jin daɗin yadda ake zubar da jini, amma suna ganin an tilasta musu ci gaba da aikata hakan.
Ya ce ’yan bindigar sun zargi jami’an tsaro da ’yan banga da kashe mata da yara a yankunansu, lamarin da suka ce ke haddasa ci gaba da kai hare-hare da ramuwar gayya.
Gumi ya yi kira da a sakw buɗe ƙofar tattaunawa tsakanin ɓangarorin da ke rikicin ya shafa, yana mai cewa malaman addini na da rawar da za su taka wajen kawo ƙarshen kashe-kashen.
Ya kuma yi zargin cewa wasu ƙungiyoyin ’yan bindiga na samun tallafin kuɗi da suke amfani da shi wajen sayen makamai domin yin gogayya da sauran ƙungiyoyi.
Haka kuma, ya yi zargin cewa wasu hukumomin leƙen asirin ƙasashen waje na iya kasancewa cikin masu samar wa ƙungiyoyin makamai, amma bai gabatar da wata hujja da za ta tabbatar da wannan iƙirari ba.
Arewacin Nijeriya na ci gaba da fuskantar matsalar ’yan bindiga, waɗanda ke kai hare-hare, kashe mutane da yin garkuwa da jama’a.
