Babban jami’in diflomasiyya na kasar Sin, Wang Yi ya gana da Ali Bagheri Kani, mataimakin sakataren majalisar kolin tsaron kasar Iran a birnin Beijing, hedkwatar mulkin kasar Sin jiya Litinin. Kazalika ya kuma yi shawarwari da Musaad bin Mohammed Al-Aiban, karamin ministan kasar Saudiyya, mamba a majalisar ministocin kasar kuma mai ba da shawara kan harkokin tsaron kasar.
Yayin ganawar da ya yi tare da Ali Bagheri Kani, Wang Yi ya bayyana cewa, Sin za ta ci gaba da bin shawarwari da tsare-tsare da shugaba Xi Jinping ya gabatar, domin saukaka yanayin da ake ciki a yankin gabas ta tsakiya, da kuma maido da zaman lafiya.
A nasa jawabin, Ali ya ce, Iran ta yaba da shawarwari da tsare-tsaren da shugaba Xi ya bijiro da su, da kuma himmar da kasar Sin ta sa wajen tsarin hadin gwiwar kasashe da dama, tare da fatan ganin kasar ta takawa muhimmiyar rawa wajen samar da zaman lafiyar kasa da kasa da kuma na shiyya-shiyya.
Ya kara da cewa Iran a shirye take ta habaka dangantakar diflomasiyya tsakaninta da Sin, tare da bunkasa hadin gwiwa a tsarin kasa da kasa da kuma na kasashe da dama. A ganawar Wang Yi da Musaad bin Mohammed Al-Aiban na Saudiyya kuwa, Al-Aiban ya mika wasikar da firaministan Saudiyya, yarima Mohammed bin Salman ya rubutowa Shugaba Xi Jinping, kan bunkasa alakar diflomasiyya tsakanin kasashen biyu da kuma batutuwan muradun bai daya.
Da yake gabatar da jawabi, Wang ya nuna alakar Sin da Saudiyya a matsayin fifiko a tsarin kawancen diflomasiyyarta a yankin gabas ta tsakiya, karkashin tsararrun dabarun manyan shugabannin kasashen biyu, yana mai cewa alakar Sin da Saudiyya na ci gaba da bunkasa tare da zama wani karfi na samar da kwanciyar hankali a yankin gabas ta tsakiya. (Suleiman Suleiman )
