Da safiyar yau 3 ga watan Nuwamba, firaministan kasar Sin, Li Qiang, ya halarci bikin bude Babban Taron Intanet na Duniya na shekarar 2026 a garin Wuzhen, da ke lardin Zhejiang, inda ya gabatar da muhimmin jawabi.
Li Qiang ya bayyana cewa, an gudanar da Babban Taron Intanet na Duniya a tsawon shekaru 13 a jere. Kuma duk da saurin ci gaban fasaha da fasalin yadda take ta sauyawa, akwai wata muhimmiyar tambaya da ta zamo damuwar da ta shafi kowa da kowa wadda har yanzu tana ci gaba da wanzuwa, watau ta yaya za a tabbatar da cewa Intanet ta fi ba da gudummawa ga amfanar da bil’adama? A Babban Taron Intanet na Duniya na shekarar 2015, shugaba Xi Jinping ya gabatar da ra’ayin gina al’umma mai kyakkyawar makoma ta bai-daya a fagen sadarwar intanet, inda ya ba da gudunmawar dabarar kasar Sin wajen tunkarar batutuwan da suka shafi ci gaba da kuma tafiyar da sha’anin Intanet.
Har ila yau, Li Qiang ya bayyana cewa, ci gaban intanet a wannan zamani yana bukatar ba da fifiko sosai kan manufofin da za su fifita ci gaban bil’adama. Kamata ya yi babban burin ci gaban intanet ya kasance karfafa bunkasar al’umma ta kowane fanni.
Yolanda Díaz Pérez, mataimakiyar firaministan kasar Spain, da sauran wasu manyan baki daban-daban sun halarci bikin bude taron tare da gabatar da jawabi. Kimanin mutane 1,800 ne suka halarci bikin bude taron, ciki har da jami’an gwamnatoci daga kasashe daban-daban, da shugabannin kungiyoyi da hukumomin kasa da kasa kamar MDD, da wakilan kamfanonin intanet na duniya, da kuma kwararru da masana. (Abdulrazaq Yahuza Jere)
