Bayan aukuwar girgizar kasa mai karfin maki 7.0 a gundumar Baqen ta birnin Nagqu dake jihar Xizang mai cin gashin kai, ta kudu maso yammacin kasar Sin a ranar Alhamis, an aike da ma’aikatan ceto sama da 5,000.  Girgizar kasar wadda ta auku da misalin karfe 10:33 na dare, ta sabbaba rasuwar mutane 16, tare da jikkatar wasu 76, kana gidaje 339 sun rushe ko sun lalace. A cewar cibiyar bayar da umarnin gaggawa game da girgizar kasa ta gundumar Baqen, ya zuwa karfe uku na yammacin jiya Jumma’a, an kwashe mutane 12,489 lami lafiya. Kazalika, ba a samu rahoton bacewar mutane ba, bayan gudanar da zagaye uku na tantancewa.  Jim kadan bayan aukuwar ibtila’in, reshen yammaci na rundunar ’yantar da al’ummar kasar Sin ko PLA, ya kaddamar da tsarinsa na aikin gaggawa. Kana ya zuwa karfe hudu na yammacin jiyan, sama da dakarun PLA 400, da dakarun rundunar ’yan sanda ta kasar, tare da sama da ababen hawa 50 sun isa wajen domin jinyar wadanda suka jikkata, da kafa tantuna, da sake tsugunar da al’ummun wurin. Har ila yau, an kafa cibiyoyin wucin gadi na kula da lafiya guda biyu, da cibiyoyin rabon abinci masu hidimtawa jama’a.  A daya bangaren kuma, hukumomin tsakiya, da na jiha, da na birane da gundumomi, sun aike da kayan agaji, ciki har da gidajen wucin gadi, da tantuna, da barguna da kayan sanyi. (Saminu Alhassan) 

Babban daraktan sashen musaya tsakanin sassan kasa da kasa a majalisar kasuwanci ta Sin da Afirka Joseph Olivier Mendo’o, ya ce kasar Sin ta gina wasu jerin dandali na hadin gwiwa, domin moriyar abokan tafiyarta membobin kasashe masu tasowa, da nufin hada kai wajen magance rashin daidaito a tsarin jagorancin duniya.  Mendo’o, wanda ya bayyana hakan ga kafar CGTN, a gefen dandalin tattauna batun jagorancin duniya na Xiong’an na shekarar nan ta 2026, ya ce “Kasashe masu tasowa ba wakilci suke bukata ba, burinsu shi ne a saurari muryoyinsu.”  Kazalika, jami’in ya ce kasar Sin karkashin shawarar inganta jagorancin duniya ko GGI, wadda ke ingiza gina tsarin jagorancin duniya mai karin adalci da daidaito, da samar da kyakkyawar duniya, ta zamo jigo wajen cimma wadannan matakai.  Dandalin Xiong’an na bana, zai gudana ne cikin kwanaki uku a sabon yankin Xiong’an na lardin Hebei na arewacin kasar Sin tun daga jiya Jumma’a, bisa taken “Sake gina kwarin gwiwa da hadin gwiwa: Sauye-sauye da ba a ga irinsu ba cikin karni, da kwaskwarima da inganta tsarin jagorancin duniya”.   A cewar mista Mendo’o, Sin ta gina jerin dandalin hadin kai, irinsu na hadin gwiwar Sin da Afirka wato FOCAC, ta kuma mara baya ga kungiyar tarayyar Afirka ta AU da ta shiga kungiyar G20, don yayata muryar kasashe masu tasowa.  Cikin jawabin da ya gabatar yayin bude dandalin na bana a jiya Jumma’a, ministan harkokin wajen kasar Sin Wang Yi, wanda kuma memba ne a ofishin siyasa na kwamitin kolin JKS, ya ce yana da muhimmanci a inganta wakilci, da muryar kasashe masu tasowa a harkokin kasa da kasa.  Game da hakan, Mendo’o ya ce kasashe masu tasowa, da suka hada da na nahiyar Afirka da kasar Sin, kamata ya yi su shiga a dama da su a fannin tsara dokokin gudanar da duniya.  Daga nan sai ya jaddada muhimmancin dunkulewar kasashe masu tasowa, a matsayin karfi guda don magance tarin kalubale yadda ya kamata, duba da cewa daidaikun kasashe na iya samun saurin ci gaba, amma hadakar yunkurin bai daya, shi ne zai iya haifar da ci gaba na tsawon lokaci kuma mai game sassa masu nisa. Ya ce “Kasa daya cikin jerin kasashe masu tasowa ba za ta iya yin nisa ita kadai ba, amma idan mun dunkule tare za mu iya kaiwa wuri mai nisan gaske.” (Saminu Alhassan) 

Girgizar kasa mai karfin maki 7.0 ta afku a gundumar Baqen ta birnin Nagqu na jihar Xizang ta kasar Sin, da misali karfe 10:33 na dare a ranar 22 ga watan nan da muke ciki, inda ta yi sanadin mutuwar mutane da jikkata masu yawa.  Bayan abkuwar ibtila’in, shugaban kasar Sin Xi Jinping ya mayar da hankali matuka kan lamarin kuma ya ba da umarni cewa, dole ne a yi bakin kokarin ceto mutanen da ibtila’in ya rutsa da su, da jinyar wadanda suka jikkata, domin a rage mutuwar mutane.  Xi kuma ya jaddada cewa, yankin da girgizar ta abku yana cikin yanki mai tsayi da sanyi, don haka dole ne a sa ido sosai kan yanayin kasan wurin da canjin yanayi, kuma a gudanar da aikin ceto yadda ya kamata, da kandagarkin hadarin abkuwar kanana masu biyo baya.   Kazalika, ya kara da cewa, dole ne a hanzarta tura kayayyakin agaji na ceto da tsugunar da mutane yadda ya kamata, kana da gyara ababen more rayuwa da suka lalace tare da tabbatar da kare lafiyar rayuka da dukiyar jama'a.   A cewar rahoton da hukumar ba da agajin gaggawa ta birnin ta fitar, mutane 16 sun rasu yayin da 32 suka jikkata, a misalin karfe 3 da saura minti 5 na safiyar yau Juma’a, 11 daga cikin 32 da suka jikkata suna cikin mawuyacin hali, yayin da raguwar 21 kuma suka samu kananan raunuka, sannan gidaje sama da 300 sun rushe.  Zuwa yanzu ana ci gaba da auna girman barnan da girgizar kasar ta yi, sannan ayyukan rage radadi na ci gaba da gudana a yankin.  Sama da jami’an ’yan sanda 300 aka aika wurin da abin ya afku domin ayyukan rage radadi, yayin da hukumar kashe gobara da bayar da ayyukan ceto ta aika jami’ai 347 zuwa yankunan da abin ya rutsa da su. (Amina Xu) 

Yayin da tarin kalubale ke kara addabar duniya, abun da sassan kasa da kasa suka fi matukar bukata ba karin fito-na-fito ba ne, maimakon haka bukatar ita ce sake gina aminci da farfado da hadin gwiwa, ta yadda tsarin jagorancin duniya zai kai ga amsa tambayoyin wannan lokaci.   Dandalin tattauna batun jagorancin duniya na shekarar nan ta 2026 ko Xiong’an, wanda ke gudana bisa taken “Sake gina kwarin gwiwa da hadin gwiwa: Gyare-gyare da inganta jagorancin duniya a duniya mai sassauyawa,” ya hallara al’ummu daga sassan rayuwa daban daban, da nufin bunkasa dabaru na garanbawul da inganta tsarin jagorancin duniya. Dandalin ya aike da sako na hakika: Cimma matsaya daya duk da banbance-babance, da aiki tare don warware matsalolin bai daya da ake fuskanta. Wannan shi ne muhimmin mataki da zai kai ga shawo kan kalubalen jagorancin duniya a zahiri.  A watan Satumban shekarar 2025, Sin ta gabatar da shawarar jagorancin duniya, tare da jaddada muhimmancin ikon cin gashin kai na kowa da kowa bisa daidaito, da rungumar dokokin kasa da kasa, da cudanyar mabanbantan sassa, da mayar da jama’a gaban komai, da hadin gwiwa mai mayar da hankali ga aiki tukuru.   Wani sakamakon bincike da kafar CGTN ta kasar Sin ta gudanar ya nuna yada wadannan muhimman batutuwa suka samu matukar karbuwa tsakanin masu bayyana ra’ayoyi na kasa da kasa, inda kaso sama da 60 bisa dari na masu bayyana ra’ayoyin suka amince cewa, shawarar inganta jagorancin duniya ko GGI, ta saita alkiblar kasashe zuwa ga shiga a dama da su a ayyukan kyautata jagorancin duniya.   Muhimmancin dandalin shekarar nan ta 2026 na tattauna batun jagorancin duniya ko dandalin Xiong’an, shi ne yadda ya shaida bukatar da duniya ke da ita, ta ba wai gabatar da kalaman fatar baki kadai daga sassan hukumomi ba, wadanda suka saba da hakikanin hali na zahiri, maimakon hakan ana bukatar kafa tsarin hadin gwiwa da zai magance bukatun dukkanin kasashe, da warware matsaloli na hakika, da kuma baiwa karin kasashe damar shiga a dama da su.  (Saminu Alhassan) 

Lafiyar jiki ta dogara ne kan kyakkyawar kulawa ta yau da kullum, kuma a ganin Jam’iyyar Kwaminis ta kasar Sin...

A yau Juma’a ne shugaban kasar Sin Xi Jinping, ya aike da sako ga dandalin tattauna batun jagorancin duniya na Xiong’an na shekarar nan ta 2026.  Cikin sakon nasa, shugaba Xi ya ce a halin da ake ciki, sauye-sauye da ba a taba ganin irinsu a karbi ba na gaggauta faruwa a sassan duniya, kana ana ganin fadadar gibi a fannin zaman lafiya, da ci gaba, da tsaro da jagoranci. Ya gabatar da shawarar inganta jagorancin duniya, wadda manufarta ita ce ingiza gina karin adalci, da daidaito a tsarin jagorancin duniya, da samar da duniya mai inganci.   Shugaba Xi, ya ce Sin a shirye take ta yi aiki tare da dukkanin sassa don aiwatar da akidar jagorancin duniya, mai kunshe da zurfafa shawarwari, da hada hannu wajen samar da gudunmawar cimma moriyar bai daya, da karfafa tafiya bisa kwarin gwiwa, da shawo kan batutuwa masu wahala ta hanyar hadin gwiwa, da ingiza aiwatar da tsarin jagorancin duniya, da shigar da karin tabbaci da kyakkyawan karsashi cikin duniya mai cike da rashin daidaito da sauye-sauye, da hada karfi wajen samar da al’umma mai makomar bai daya ga dukkanin bil’adama.An kaddamar da dandalin Xiong’an na 2026 ne a yau, a sabon yankin Xiong’an na lardin Hebei, bisa taken "Sake gina kwarin gwiwa da hadin gwiwa: Sauye-sauye da ba ga irinsu ba cikin karni, da kwaskwarima da inganta tsarin jagorancin duniya".  (Saminu Alhassan)

A yau Juma’a 23 ga watan Oktoba ma’aikatar kasuwanci ta kasar Sin MOC ta gabatar da rahoton yadda kasuwar cinikayya ta kasar ta gudanar da ayyukanta, a watanni tara na farkon shekarar nan, inda ta lura cewa, matakan bunkasa amfani da kayayyaki da aka dauka suna fadada kasuwar cinikayyar kayayyaki, sannan tsarin sayayyar kayayyaki daga mazauna kasar na ci gaba da bunkasa.  A cewar rahoton, a watanni 9 na farkon shekarar nan, matsakaicin amfani da kayayyaki da mazauna kasar suka yi ya kai Yuan 22,000 wanda ya dara na shekarar bara da kaso 3.6. Hakikanin ci gaban da aka samu bayan tasirin sauyin farashin kayayyaki ya kasance a kan maki 2.7 cikin dari, yayin da cinikayyar kayayyaki da ake sayarwa kai tsaye ga masu amfani ya karu da kaso 2.6 cikin dari sama da na shekarar bara. Kazalika cinikayyar hidimomi kai tsaye ga masu amfani ya samu tagomashi da karin kaso 5.0 cikin dari.  Jimillar hada-hadar sayen kayayyaki ya bayar da gudummawa wajen bunkasa tattalin arzikin kasar Sin da kaso 46.7 cikin dari wanda ya haifar da bunkasar ma’aunin GDP da kaso 2.1 cikin dari. (Suleiman Suleiman) 

Wakilin Sin na dindindin a MDD Fu Cong, ya yi jawabi jiya 22 a babban taron MDD kan batun gyare-gyaren kwamitin sulhu, inda ya jaddada cewa makasudin gyare-gyaren da ake sa ran yi wa kwamitin sulhu shi ne, canja halin da kwamitin ke ciki na ba da karfin wakilcin kasashe masu wadata a kwamitin fiye da kima.  Fu Cong ya ce, Sin na goyon bayan kwamitin sulhu ya yi gyare-gyare da suka wajaba kuma masu ma'ana domin kara karfin iko da ingancinsa, da kara karfin fuskantar rikice-rikice da kalubale, da gudanar da aikin da kundin tsarin MDD ya dora masa.  Fu Cong ya gabatar da shawarwari guda 3, wadanda suka kunshi, na farko, dole ne a mai da hankali kan kara karfin kasashe masu tasowa a kwamitin a fannin wakilci da damar yin magana. A ba da dama ga kasashe masu tasowa da ke da 'yancin kai a manufofin harkokin waje, da kananan da matsakaitan kasashe, wajen shiga aikin yanke shawara a kwamitin, musamman a gyara kuskuren da aka yi wa Afirka a tarihi, da kuma amsa bukatun Afirka bisa manufar karamci.  Na biyu, dole ne a mutunta yarjejeniyar kasashe mambobin kungiyar, da kuma dagewa kan warware batutuwa daga tushe. Idan a samar da "shirin gyare-gyare iri daya" cikin gaggawa kafin bangarorin da abin ya shafa su cimma cikakkiyar matsaya daya, hakan zai kara tsananta sabanin ra'ayi da rikice-rikice tsakanin bangarorin.  Na uku, a tabbatar da cewa tattaunawar da ake yi tsakanin gwamnatoci ita ce kadai halastacciyar turbar da mambobin kasashen majalisar ke bi wajen tattauna batun gyare-gyaren kwamitin, kuma ya zama ba za a iya maye gurbin rawar da take takawa ba.(Amina Xu) 

 A yau, an bude dandalin tattaunawa kan inganta tsarin jagorancin duniya na shekarar 2026, a sabon yanki na Xiong'an na kasar Sin. Taken dandalin kuma shi ne "Sake samar da kwarin gwiwa da damar hadin gwiwa: Manyan sauye-sauyen da ake fuskanta da kuma batun inganta tsarin jagorancin duniya."   Kafin haka, a watan Satumban bara, shugaban kasar Sin Xi Jinping ya gabatar da babbar shawarar inganta tsarin jagorancin duniya a taron kungiyar hadin gwiwa ta Shanghai (SCO). Daga baya, a watan Mayu na bana, kasar Sin ta kira taron "Kungiyar abokai da suka amince da shawarar inganta tsarin jagorancin duniya" a hedkwatar Majalisar Dinkin Duniya da ke birnin New York na kasar Amurka, kafin daga bisani a watan Yunin da ya gabata, kasar ta fitar da takardar bayani don bayyana ra'ayinta a fannin inganta tsarin jagorancin duniya.  Shin ko me ya sa kasar Sin ke mai da cikakken hankali kan batun inganta tsarin jagorancin duniya? Dalili shi ne tsarin jagorancin duniya yana cikin wani yanayi na matukar bukatar samun gyara. A duniyarmu, yadda dimbin kasashe masu tasowa ke samun ci gaba cikin sauri ya riga ya sauya fasalin tattalin arzikin duniya, amma har yanzu tsarin raba wakilci da ikon fada-a-ji ta fuskar jagorancin duniya bai canza sosai ba. A bisa wannan yanayi ne, gibin jagoranci yake bayyana a sabbin fannoni, kamarsu tinkarar sauyin yanayin duniya, da fasahar kirkirarriyar basira ta AI, da harkoki masu alaka da yanar gizo ta Intanet, da tsaron sararin samaniya, yayin da manufar damawa da bangarori daban-daban ke fama da mawuyacin hali, sakamakon yadda wasu kasashe ke yawan daukar matakan kashin kai da nuna salon daukar matsaya biyu.  To, ko ta yaya za a iya inganta jagorancin duniya? Dangane da wannan tambaya, amsar da kasar Sin ta gabatar ita ce babbar shawarar inganta tsarin jagorancin duniya, wadda manyan ka'idojinta su ne "Tabbatar da daidaiton mabambantan kasashe a fannin ikon mulkin kansu, da bin dokokin kasa da kasa, da aiwatar da manufar cudanyar sassa daban daban, da dora muhimmancin mutane a gaba da komai, da kuma kokarin daukar takamaiman matakai." Wannan shawara tana da nufin sanya tsarin jagorancin duniya ya kara zama mai adalci da gaskiya, tare da tabbatar da cewa mabambantan kasashe za su dauki nauyin tsarawa da kare ka'idojin duniya a hadin gwiwarsu. Tun lokacin da aka gabatar da shawarar, ta samu goyon baya daga kasashe da kungiyoyin kasa da kasa su kusan 160. Wannan ya nuna cewa, shawarar nan da kasar Sin ta gabatar za ta iya biyan bukatar galibin kasashe, musamman ma wadanda ke kan hanyar tasowa.  A kan batun jagorancin duniya, kasar Sin da kasashen Afirka suna da matsaya iri daya. Saboda Sin da Afirka dukkansu sun yi kira da a yi wa Majalisar Dinkin Duniya da kwamitin sulhu dake karkashin majalisar garambawul, don daidaita yanayin rashin adalci da kasashen Afirka ke fuskanta sakamakon wasu batutuwan tarihi, da kuma kara wakilcin kasashe masu tasowa, musamman ma kasashen Afirka, a Majalisar Dinkin Duniya da kwamitin sulhunta. Kana a fannin huldar kasa da kasa, Sin da Afirka sun nuna cikakken goyon baya ga ka'idojin dangantakar kasa da kasa, wadanda aka tsara bisa tushen kundin Majalisar Dinkin Duniya, kuma suna adawa da mulkin danniya, da yunkurin raba kasashe zuwa rukunoni daban daban bisa ra'ayin mulki, gami da ta da rikici tsakanin rukunonin. A fannin tattalin arziki, Sin da Afirka suna goyon bayan dunkulewar duniya a fannin tattalin arziki a kokarin amfanin kowa, tare da bukatar yin gyare-gyare a hukumomin hada-hadar kudi na duniya, kamar su Bankin Duniya, da Asusun ba da lamuni na duniya, don habaka wakilcin kasashe masu tasowa a cikin wadannan hukumomi, da ba su ikon bayyana ra'ayoyinsu.  Dandalin tattaunawa kan inganta tsarin jagorancin duniya da aka kira a wannan karo ya kunshi kananan tarukan tattaunawa guda biyar, wadanda ke mai da hankali kan wasu batutuwa masu nasaba da jagorancin duniya da suka fi janyo hankalin mutanen duniya, wato su: "Aiwatar da manufar cudanyar sassa daban daban, da kare tsarin duniya mai daukaka matsayin Majalisar Dinkin Duniya", da "Yayata ra'ayin yin hadin gwiwa gami da amfanar da juna, da neman cimma ra'ayi daya don kara saurin ci gaban tattalin arziki", da "Tabbatar da daidaito da fa'idar juna, da zurfafa gyare-gyaren tsarin tattalin arziki da na hada-hadar kudi", da "Inganta jagoranci a wasu sabbin fannoni, kamarsu fasahar AI, da yanar gizo ko Intanet, da kuma sararin samaniya," da kuma "Inganta musayar al'adu, don samar da damar yarda da juna da koyi da juna". Babu shakka, kasar Sin da kasashen Afirka za su iya amfani da damar da wannan dandalin ya bayar don mai da burin da aka sanya ya zama tsarin hadin gwiwa, da daukar matakai bisa matsaya daya da aka cimma, tare da kokarin ba da gudummawa ga yunkurin gina tsarin jagorancin duniya mai adalci da gaskiya. (Bello Wang) 

Jakadan kasar Sin kan kwance damarar makamai Li Chijiang, ya gabatar da jawabi kan batutuwan da suka shafi tsaron sararin samaniya a zaman kwamitin farko na zauren MDD na 21, inda ya jaddada cewa, kare gasar makamai da jibge su a sararin samaniya, shi ne batu na gaggawa da ya kamata a mayar da hankali a kai, a tsarin jagorantar tsaron sararin samaniya.  Li Chijiang ya ce yadda ake gasar makamai da jibge su a sararin samaniya, ta zama wata babbar barazana a yanzu. Ya ce Amurka na daukar sararin samaniya a matsayin fagen daga, kuma a bayyane take tura makamai cikin da’irar samaniya, lamarin dake aike mummunan sako ga kasa da kasa. Ya ce yadda galibin kasashe ke fafutukar kare tsaron sararin samaniya da burin wata kasa daya tilo na mamaye sararin sama, abu ne da ba a taba gani ba, lamarin dake haifar da gagarumin kalubale ga tsaron samaniya.   Jakadan na Sin ya gabatar da wasu shawarwari 4 dangane da batun. Shawara ta farko ita ce: ya kamata kare gasar makamai da jibge su a sararin samaniya ya zama batu mafi muhimmanci a tsarin shugabancin tsaron samaniyar. Ta biyu, a yi maraba da kokarin kasa da kasa na karfafa tattaunawa da cimma matsaya kan yarjejeniyoyin takaita makamai a samaniya. Shawara ta uku ita ce, nacewa tuntubar juna tsakanin bangarori daban-daban da adawa da fuska biyu. Ta hudu kuma, jaddada mayar da hankali kan batutuwa masu tasowa. Misali, gudanar da bincike mai zurfi kan dokokin da suka shafi takkadama da kalubalen dake tasowa daga harkokin kasuwanci masu alaka da rikicin makamai tsakanin kasa da kasa a sararin samaniya da lalubo ingantattun mafita masu karbuwa bisa cikakkiyar tuntubar juna. (Fa’iza Mustapha)