A yayin taron manema labarai na yau da kullum da ma'aikatar kasuwanci ta kasar Sin ta gudanar da yinin yau, mai magana da yawun ma'aikatar, He Yadong, ya yi bayani kan batun da ya shafi zagaye na takwas na tattaunawar tattalin arziki da cinikayya, wadda tawagogin Sin da Amurka suka gudanar a birnin New York na kasar ta Amurka.  He Yadong ya gabatar da cewa, a kwanan nan, tawagogin tattalin arziki da kasuwanci na kasashen biyu sun gudanar da zagaye na takwas na tattaunawar tattalin arziki da cinikayya a Amurka. Bangarorin biyu sun yi shawarwari masu zurfi na gaskiya da gaskiya, kan batutuwan tattalin arziki da cinikayya da suka shafe su, kamar aiwatar da yarjejeniyar matsayar da aka cimma a tattaunawar tattalin arziki da cinikayya, da aiwatar da tsare-tsaren rage haraji daidai-wa-daida, da kuma kafa majalisun cinikayya da zuba jari, kana sun cimma wasu matsaya da dama.   Kazalika, bangarorin biyu sun kuma tattauna a karon farko game da fasahar kirkirarriyar basira ta AI a karkashin tsarin tattaunawar tattalin arziki da cinikayyar Sin da Amurka. (Mai Fassara: Abdulrazaq Yahuza Jere) 

A karkashin shawarar inganta ci gaban duniya ko GDI da kasar Sin ta gabatar, gwamnatin Sin ta gudanar da muhimman ayyukan hadin gwiwa sama da 2,000 tare da sassa daban daban, ayyukan da kai tsaye suka amfanar da al’ummu a sama da kasashe da yankunan duniya 120. Wadannan ayyuka sun samar da wani ginshiki na kaiwa ga cimma manufofin dake kunshe cikin ajadar MDD ta wanzar da ci gaba nan zuwa shekarar 2030.  Cikin wadannan shirye-shirye, a kusa da gida kasar Sin ta yi hadin gwiwa da asusun yara na majalisar dinkin duniya tare da larduna da dama na kasar Laos, wajen aiwatar da shirin samar da abinci mai gina jiki ga yara kanana. Karkashin hakan, an tanadi hidimomin tantance lafiya, da na jinya mai inganci, da kandagarkin cututtuka, matakan da suka ceto rayukan yara masu fama da karancin koshin lafiya.  Idan muka leka kasar Habasha ta shiyyar kahon Afirka, za mu tarar da cibiyar horar da sana’o’i ta Luban, wadda kasar Sin ta kaddamar a shekarar 2021, cibiyar da tuni kungiyar tarayyar Afirka ta AU ta jinjinawa, tare da bayyana ta a matsayin dandalin samar da kwarewa ga daukacin al’ummun Afirka. A cibiyar, ma’aikata da ake horar wa na samun dabaru da sanin makamar aiki, wadanda ke taimaka musu a fannin kara zamanantar da masana’antun kasashensu.  A yanzu haka, shawarar GDI, na kara samun karbuwa tsakanin sassan kasa da kasa. Inda tuni kasashe sama da 130, da hukumomin kasa da kasa suka bayyana amincewa da ita, tare da shiga hadin gwiwa da ita. A daya bangaren kuma, ta samu damar yin kawance da kusan abokan hulda 100, wadanda suka sanya hannu kan takardun yarjejeniyar hadin gwiwa na musamman na shiga ayyukan da kasar Sin ta tanada karkashin shawarar. Har ila yau, akwai wasu kasahe 88 da suka shiga rukunin kawance na shawarar ta GDI, yayin da tsarin aikin majalisar dinkin duniya mai nasaba da shawarar ya samu shigar hukumomin ingiza ci gaba guda 20.  Shawarar GDI ta dace da dadaddiyar manufar kasar Sin ta yin tafiya tare da dukkanin sassan duniya a fannin neman hanyoyin bunkasa ci gaba. Kuma mahukuntan kasar Sin sun sha alwashin ci gaba da aiwatar da matakai daban daban na ingiza ci gaban duniya, da aiki tare da dukkanin sassa, wajen karfafa karsashi da hadin kai, da nufin dinke dukkanin bangarori, ta yadda za a kai ga cimma karin moriyar bai daya ga dukkanin al’ummun duniya. (Saminu Alhassan) 

A yau Alhamis, firaministan kasar Sin, Li Qiang, ya gabatar da jawabi a bikin kaddamar da bikin baje kolin cinikayyar...

Shugaban kasar Sin Xi Jinping ya isa Washington DC a jirgin sama na musamman ran 23 ga watan Satumba da...

Shugaban kamfanin Tesla, Elon Musk, ya bayyana sabbin ra’ayoyinsa game da kasuwar kasar Sin, da fasahar kirkirarriyar basira ta AI...

An kaddamar da dandalin al’adu na birnin Beijing na shekarar nan ta 2026 a jiya Talata, dandalin da ya hallara sama da baki 600 daga kasashe da yankunan duniya 44, don tattaunawa kan kare al’adun da aka gada daga kaka da kakanni, da koyi da juna tsakanin mabanbantan wayewar kai.  Li Shulei, shugaban sashen yayyata ayyukan JKS na kwamitin kolin jam’iyyar, ya halarci taron tare da gabatar da jawabi.  Mahalarta dandalin daga bangaren Sin da na kasashen ketare sun bayyana shawarar inganta wayewar kan duniya da Sin ta gabatar, tare da sauran matakai na ingiza hadin gwiwar kasa da kasa a fannin al’adun gado, da samar da al’umma mai makomar bai daya ga daukacin bil’adama, a matsayin muhimman manufofi na bunkasa al’adun da aka gada daga kaka da kakanni a Sin da ma sauran sassan duniya.  Sun kuma bayyana gadon al’adu a matsayin wata kadara ta daukacin bil’adama, kuma kare ta, da gadar da ita, da kyakkyawan amfani da ita a matsayin muhimman matakai na ci gaba da wanzar da wayewar kai na bil’adama da wanzar da ci gaban duniya.  Bugu da kari, mahalarta dandalin sun yi kira da a karfafa kwazo wajen kare gadon al’adun dan’adam, da nacewa ka’idojin kariya da farko, da amfani da su yadda ya kamata, da takaita tsoma hannu cikin tsarin baiwa al’adun kariya, da kare al’adun gado tamkar yadda muke kare rayukanmu.  (Saminu Alhassan) 

An bude gasar nuna kwarewar aiki karo na 48 a birnin Shanghai a jiya Talata, inda mutane 1,385 daga kasashe 68 za su fafata a fannoni 64 na gasar.   Kasar Sin, na da wakilai 71 da za su fafata a fannoni 64 da aka tsara, wanda a cewar masu shirya gasar, ya hade sassa 6 da suka kunshi sufuri da jigilar kayayyaki, fasahar gine-gine, fasahar kere-kere da injiniyanci, fasahar sadarwa da yada labarai, kirkire-kirkire, da ayyukan zamantakewa da hidimomin kai.  Gasar ta bana an yi mata take da ”kware a aikinka domin canza rayuwarka”, inda ta hada kwararrun matasa daga kowanne lungu da sako na duniya, domin su nuna gogewarsu da kuma musayar kwarewa a tsakaninsu.   Firaministan kasar Sin Li Qiang, ya halarci bikin bude gasar tare da gabatar da jawabi.  Li Qiang, ya ce shugaban kasar Sin Xi Jinping a cikin wasikar taya murna da ya aike ga taron kwarewar sana’o’i na duniya karo na 48, ya yaba da rawar da gasar ke takawa a matsayin dandalin musayar kwarewar sana’o’i ta duniya, kuma ya bayyana matsayin Sin na goyon bayan ci gaban harkokin kwarewar sana’o’i na duniya. Wannan taron mai taken “kwarewar sana’o’i tana haskaka makoma”, wanda hakan ya dace da ci gaban zamani.   Li ya kuma gabatar da jawabi yana mai cew,a da farko, nasarorin ci gaban Sin suna dogaro da gudummawa ta musamman daga fannin kwarewar sana’o’i. Na biyu, Sin ta ci gaba da kokarin bunkasa karfin kwarewar ma’aikata. Na uku, tana yin hadin gwiwa wajen kafa kyakkyawar makoma ta ci gaban kwarewar sana’o’i.  Firaministan Malaysia Anwar Ibrahim, da shugaban kungiyar kwarewar sana’o’i ta duniya ‌Francis Hourant da sauran baki sun halarci bikin, kuma a cikin jawabansu, sun jinjinawa yadda gwamnatin Sin ta jima tana aiki tukuru wajen horar da kwararrun sana’o’i, wanda hakan ke ba da karfi ga ci gaban tattalin arziki da zamantakewarta, kana yake ba da gudummawa mai muhimmanci a fannin habaka harkokin kwarewar sana’o'i na duniya da ci gaban matasa. Ci gaban kwarewar sana’o’i ya zama abin da gwamnatocin kasashe suka sa a gaba, kuma bangarori daban-daban na fatan karfafa gogewa tare da Sin, domin mayar da kwarewar ta zama wata muhimmiyar hanya ta hadin gwiwa dake kawo moriya ga kowa.  (Mai Fassara: Suleiman Suleiman, Amina Xu) 

Babban taron zauren MDD (UNGA) karo na 81 da ake gudanarwa daga ranar Talata 22 zuwa Litinin 28 ga Satumban 2026, ya zo a wani irin lokaci da duniya ta shiga tsaka-mai-wuya bisa yake-yake daban-daban da ake fama da su, da rashin girmama tsarin dokokin kasa da kasa, da hamayyar manyan kasashe masu kumbar susa da kuma rarrabuwar kawuna a tsakanin kasashe masu fada-a-ji.  Rahoton da cibiyar bincike kan sha’anin zaman lafiya ta kasa da kasa da ke Stockholm ta kasar Sweden (SPRI) ta fitar a 2026, ya ce adadin mutane da aka kashe, da wadanda aka raba su da gidajensu ko suke bukatar agajin jin kai saboda yake-yake, sun kai wani adadi da ba a taba gani ba a cikin gomman shekaru. Don haka, a yayin da ake gudanar da wannan taro na zauren MDD, kasashen duniya suna da wani babban nauyi da ya kamata su sauke daga wuyansu.  Kasar Sin, a matsayin babbar kasa da ke kokarin sauke nauyin da ya rataya a wuyanta, ta sha nanata kiraye-kirayen bin tafarkin amfani da ka’idojin kundin tsarin MDD, musamman ma kan abin da ya shafi kiyaye ’yancin kasashe da martabar yankunansu, da rashin tsoma baki cikin harkokin gidansu, da hana barazana ko amfani da karfi wajen warware takaddama. Kasar Sin ta sha jaddada cewa ya kamata a yi amfani da dokokin kasa da kasa cikin daidaito, ba tare da ware wasu shafaffu da mai ba.  Yayin da mataimakin shugaban kasar Sin, Han Zheng zai wakilci kasar a babban taron na UNGA daga ranar 24 zuwa 26 ga watan, ana dakon sakon da kasar Sin za ta gabatar wa duniya a wannan karo. Kuma bisa yanayin rawar da kasar take takawa wajen kiyaye tsarin kasa da kasa na mabambantan bangarori, ina da yakini za ta sake jaddada batun yin hadin gwiwar kasashe wajen tunkarar kalubalen da ake fuskanta.  Ko shakka babu, duniya tana bukatar wannan taro kar ya zamo na shan shayi a watse, kuma duk da ba shi da karfin ikon tursasa kafa doka ko daukar mataki, kasashe za su iya cimma matsaya kan matsin lambar diflomasiyya wajen warware tarin matsalolin da ke jibge, da suka shafi ba da fifiko ga dakatar da yake-yake, da agajin jin kai na fararen hula, da kuma rungumar shawarar inganta sha’anin tsaro na bai-daya kamar yadda Sin ta gabatar.  Bugu da kari, kamar yadda aka sani, zaman lafiya ba zai iya samuwa yadda ya kamata a yanayi na kangin talauci, da karancin abinci, da rashin daidaito da sauran abubuwa masu nasaba ba, ya kamata kasashe su duba manufar samar da ci gaban duniya na bai-daya wadda ita ma tana cikin manyan shawarwarin da Sin ta gabatar.  Kazalika, sauran batutuwa da suka shafi cinikayya da fasahohin zamani duk suna bukatar daukar kwararan matakai tare da kyakkyawan hadin gwiwa mai karfi ta yadda za a samu mafita mafi dacewa kan matsalolin da ake fama da su da kuma masu kunno kai. Kuma wannan taro na UNGA karo na 81, wata sabuwar gaba ce da za a iya amfani da ita kan cimma wannan buri, don haka bai kamata kasashe su bari ya zama na shan shayi kawai ba. (Abdulrazaq Yahuza Jere) 

Liu Guozhong, mamba a ofishin siyasa na kwamitin kolin jam’iyyar kwaminis ta Sin, kuma mataimakin firaministan kasar, ya kai rangadin...

An gudanar da bikin karrama ’yan sama jannati na ayyukan kumbunan Shenzhou-20 da Shenzhou-21 na kasar Sin, a birnin Beijing yau Laraba.  Zhang Shengmin, mataimakin shugaban hukumar soja ta tsakiya, ya mika lambobin yabo da takardun shaida ga ’yan sama jannatin kumbon Shenzhou-20, wadanda su ne, Chen Dong, Chen Zhongrui da Wang Jie, da kuma na kumbon Shenzhou-21, wadanda suka hada da Zhang Lu, Wu Fei da kuma Zhang Hongzhang. (Abdulrazaq Yahuza Jere)