Jami’an tsaro sun kama wani mutum da ake zargin yana bai wa ’yan bindiga bayanai game da al’ummar Romo da ke ƙaramar hukumar Tambuwal a Jihar Sakkwato.
Wanda ake zargin mai suna Ashiru Abubakar, ɗan asalin ƙauyen Gumfa Gebe da ke ƙaramar hukumar Wamakko ne.
Ana zargin yana aiki tare da wasu masu aikata laifuka a Tambuwal.
Rahotanni sun ce an danganta Abubakar da yunƙurin kai wa mazauna Romo hari, inda aka ba su wa’adin biyan Naira miliyan 10, ko kuma a kai musu hari.
An kama shi ne a daidai lokacin da ake ƙara fuskantar matsalolin tsaro a Tambuwal da sauran garuruwan da ke maƙwabtaka da yankin, sakamakon hare-hare da satar mutane da aka samu a baya-bayan nan.
Kakakin rundunar ’yansandan Jihar, DSP Ahmed Rufai, ya tabbatar da kama wanda ake zargin ranar Laraba, inda ya ce an gurfanar da shi a gaban kotu.
Rufai ya ce an kama Abubakar ne bayan gudanar da bincike kan ayyukansa da kuma zargin alaƙar da yake da ita da masu aikata laifuka.
Ya ƙara da cewa rundunar za ta ci gaba da ɗaukar mataki kan mutanen da ake zargin suna taimaka wa masu aikata laifuka a jihar.
Mazauna yankunan da hare-haren suka shafa sun yi kira da a ƙara yawan jami’an tsaro tare da inganta tattara bayanan sirri domin hana sake kai hare-hare da kuma taimaka wa mutanen da suka rasa matsugunansu su koma gidajensu.
