‘Yan bindiga sun kashe wasu ‘yan sa-kai uku a ƙaramar hukumar Mangu, yayin da wasu mutane huɗu da ake zargin masu haƙar ma’adinai ba bisa ƙa’ida ba suka mutu bayan wani rami ya rufta a ƙaramar hukumar Bokkos.
An ruwaito cewar ‘yan bindigar sun yi wa masu ‘yan sa-kan kwanton-ɓauna ne a daren ranar Talata, da misalin ƙarfe 9:39 na dare, a yankin da ke tsakanin Kyikyau da Gyambwas, a gundumar Mangu Halle ta ƙaramar hukumar Mangu.
Ƙungiyar Matasa ta Mwaghavul (MYM) ta ce harin ya faru ne a lokacin da dokar hana fita daga magariba zuwa safiya ke ci gaba da aiki a wasu sassan jihar.
Waɗanda aka kashe sun haɗa da Samson Dachet, mai shekara 45; Gambo Fwangyil, mai shekara 50; da Zughumnan Bamaiyi, mai shekara 35.
Daraktan Hulɗa da Jama’a na MYM, Tubwot Joël Sunday, ya ce mutanen na cikin waɗanda ke gadin al’ummarsu lokacin da ‘yan bindigar suka kai musu hari.
Ya yi Allah-wadai da harin tare da kira ga gwamnatin jihar da ta sake duba yadda ake aiwatar da dokar hana fita a Mangu.
A wani labarin kuma, mutane huɗu da ake zargin masu haƙar ma’adinai ba bisa ƙa’ida ba ne sun mutu bayan wani rami ya rufta kansu a garin Tangur, da ke ƙaramar hukumar Bokkos.
Wani mazaunin yankin, Maren Jacob, ya ce lamarin ya faru da misalin ƙarfe 2:20 na rana ranar Talata.
Ya ce mutanen suna haƙar yashi ne a kusa da wani kogi lokacin da ramin ya rufta kansu.
A cewarsa, ‘yan uwansu ne suka fito da gawarwakin domin yi musu jana’iza.
Ƙoƙarin jin ta bakin kakakin rundunar ‘yansandan Jihar Filato, DSP Alfred Alabo, bai yi nasara ba har zuwa lokacin haɗa wannan rahoto.
