Tsohon gwamnan Jihar Kaduna, Nasir El-Rufai, ya yi magana kan yadda wasu daga cikin tsofaffin abokan aikinsa, abokansa da mutanen da suka taɓa taimako suka yi shiru a lokacin da ake tsare da shi.
A cikin wata sanarwa mai taken “My Relationships and the Aftermath”, wadda ya wallafa a shafinsa na Facebook, El-Rufai ya ce ya taimaki mutane da dama a kan abin da ya yi amanna a kai.
Ya ce bai taɓa taimaka wa mutane da nufin su saka masa ba idan ya shiga wani hali.
El-Rufai ya ce mutanen da ya taɓa taimaka wa suna da damar zaɓar yadda za su mayar da martani game da halin da yake ciki.
Ya ce suna iya mara masa baya, ko su yi shiru ko kuma nesanta kansu daga gare shi.
Ya ƙara da cewa ba ya son yanke hukunci kan abin da wasu suka yi a gare shi.
Tsohon gwamnan ya ce lokacin da mutane ke fuskantar ƙalubale a rayuwa, yana koyon darasi daga abubuwan da suke faruwa ya fahimci yadda alaƙarsa ta ke da jama’a.
Sai dai ya jaddada cewa bai kamata a yi amfani da lamarinsa wajen zargin kowa ba.
El-Rufai ya kuma ce ba ya nadamar taimaka wa mutane a lokacin da ya yi imanin cewa yin hakan shi ne abin da ya dace.
Game da zargin rashin adalci da sauran abubuwan da ake dangantawa da halin da yake ciki, El-Rufai ya ce ba zai ɗauki fansa ba, yana mai cewa zai bar hukuncin komai a hannun Allah.
El-Rufai yana tsare a hannun ICPC tun a watan Fabrairun 2026, sakamakon zarge-zargen almundahanar kuɗaɗe da amfani da ofishinsa ba bisa ƙa’ida ba, sai dai ya musanta dukkan zarge-zarge.
Ya shigar ƙara a Babbar Kotun Tarayya, inda ya nemi Naira biliyan ɗaya a matsayin diyya kan tsare shi ba bisa ƙa’ida ba.
Ya kuma zargi gwamnatin Tinubu da yi masa bita da ƙulli irin na siyasa, zargin da gwamnati da hukumomin da abin ya shafa suka ƙaryata.
