Beijing, babban birnin kasar Sin ne, wanda ke da mazauna miliyan 21. A birnin, 12345 ba lambobi ne kawai ba, layin waya ne da ke hada jama'a da gwamnati. Idan ka shiga cibiyar sabis din wayar, za ka ji sautin wayoyi ba tare da tsayawa ba, inda ma'aikata sama da 1700 ke amsa kiran waya daga mazauna birnin, wadanda suke amfani da layin 12345 don bayyana matsalolin da suke fuskanta da kuma bukatunsu.  Malam Wang Zhigang mazaunin birnin ne da ke fuskantar matsalar gani, wanda ya sha fuskantar matsaloli da yawa wajen tafiya a yau da kullum. A shekarar 2024, ya yanke shawarar gwada bayyana matsalolin ta hanyar kiran layin 12345. Washegari, wata hukuma mai alaka ta tuntube shi don sanin hakikanin matsalarsa da bukatunsa, sannan ta tura ma'aikata su yi tafiya tare da shi a hanyoyin da yake bi a yau da kullum, don su duba matsalolin da ke tattare da kayayyakin taimako ga masu bukatu na musamman a hanyoyin, tare da daidaita su cikin sauri da kuma inganta sauran abubuwa masu alaka.   Kiran waya da Wang Zhigang ya yi daya ne kawai daga cikin korafe-korafe miliyan 200 da wannan layin ya daidaita cikin shekaru bakwai da suka wuce.Tun daga shekarar 2019, gwamnatin birnin Beijing ta kirkiro sabon tsarin daidaita korafe-korafen mazauna birnin da sauri, inda ta samar da layin waya na 12345 da ake iya bugawa dukkan sa’o’i 24 a kowace rana. Jigon wannan tsarin shi ne mayar da korafe-korafen jama'a zuwa hakikanan matakan daidaita harkoki. Daga gyaran lift a tsofaffin gidaje, da cunkoson tituna, zuwa wahalar da baki ke fuskanta wajen rayuwa a Beijing, in ka buga wannan waya, to za a hada ka da wanda zai taimaka wajen daidaita batun. Har ila yau, ta hanyar tattarawa da nazarin bayanan korafe-korafe masu yawa, tsarin ya shigar da matsalolin da suka fi yawa ko suka zama ruwan dare a cikin shirye-shiryen magance su na musamman, tare da kawo gyara tun daga tushen manufofi, ta hakan kuma an kai ga magance "matsala daya" zuwa "baki dayan irin matsaloli".  Ta wannan waya, a shekarar 2019 an daidaita matsaloli kimanin miliyan 6 da dubu 960 da mazauna birnin suka bayyana, sai kuma sama da miliyan 11 a 2020, da kusan miliyan 15 a 2021… adadin yana ta karuwa a kowace shekara, kuma a cikin shekaru uku da suka gabata, a kowace shekara adadin ya zarce miliyan 20. Kason korafe-korafen da aka daidaita da kuma gamsuwar da al’umma suka nuna suna karuwa a kowace shekara, kuma a bara duk sun zarce kashi 97 cikin dari. Hakan ya faru ne sakamakon manufar kula da harkokin birnin, wato "birni na jama'a ne, kuma domin jin dadin jama'a ake gudanar da harkokin birnin". Sakatare Janar na jam'iyyar Kwaminis ta kasar Afirka ta Kudu, Solly Mapaila, ya yaba da wannan tsari sosai, inda ya ce,"Da irin wannan tsarin, ba za ka sake gudanar da harkokin birnin ba tare da tushe ba, sabo da zai sa ka san sarai ko jama'a sun gamsu. Wannan shi ne abin da muke kira gudanar da harkoki ta hanyar sanya jama'a a gaba da komai."  A nahiyar Afirka, yanzu haka birane na bunkasa da sauri fiye da kowane lokaci. Daga Lagos zuwa Nairobi, daga Alkahira zuwa Johannesburg, karin mutane suna kwarara zuwa birane don neman rayuwa mai kyau. A lokaci guda kuma, ana kara fuskantar matsaloli irinsu cunkoson ababen hawa, karancin gidaje, rashin isassun hidimomi na jama'a da sauransu. Yadda za a inganta tsarin gudanar da harkokin birane tare da biyan bukatun jama'a ya zama babban darasi ga gwamnatocin kasashen Afirka, kuma tsarin birnin Beijing yana samar da wasu abubuwan koyo:  Na farko, hanyar da ba ta da wahala wajen bayyana bukatu tana da muhimmanci sosai. Layin waya mai sauki kuma ba tare da an biya sisi ba, zai iya zama "gada ta farko" tsakanin gwamnati da jama'a. Ba ya bukatar mazauna su san fasaha ko su iya amfani da intanet, kira karo daya kawai, za a ji muryarsu.  Na biyu, tsarin tara bayanai da mayar da martani abu ne da ba za a rasa shi ba. A cikin shekaru 7 da suka wuce, Beijing ya saurari korafe-korafe miliyan 200, wanda ke nufin an tattara bayanan kula da harkokin birni masu yawa cikin tsarin, tare da yin nazari da kuma amfani da su. Ana iya ganin sassan da matsaloli suka fi yawa a fili, ta hanyar tarawa da kuma nazarin bayanan.   Na uku, rigakafi ya fi magani. Tsarin na Beijing ba ya nufin sauraron korafe-korafe kawai, ya fi jaddada magance matsaloli kafin su kunno kai, wato daga magance matsala daya za a kai ga magance matsaloli makamancinsa. Misali, idan wani yanki ya sha samun korafin bacewar murfin rijiya, gwamnati ba za ta gyara murfin guda daya kawai ba, a'a, za ta duba gaba dayan yankin don gano hadarin da za a iya fuskanta. Hakan yana da matukar ma’ana ga biranen Afirka, wato maimakon a gaji da gudu don fuskantar matsalolin gaggawa iri-iri, gwamma a magance su kafin faruwarsu.  Daga ranar 12 zuwa 13, an gudanar da taron dandalin tattauna tsarin mai da martani da sauri ga korafe-korafen al’umma na shekarar 2026 a birnin Beijing, inda baki sama da 3200 daga kasashe da yankuna sama da 70 suka taru, suka mai da hankali kan batun gudanar da harkokin birni. Cikin shekaru 7 da suka wuce, Beijing ya bude wata sabuwar hanya ta zamani wajen gudanar da harkokin babban birni. Tabbas, ba za a iya kwaikwayon tsarin kai tsaye ba. Kasancewar biranen Afirka suna da tarihinsu, al'adunsu da tsarinsu na musamman, don haka dole ne a daidaita da yanayin gida. Amma ainihin manufar tsarin nan na Beijing, wato sanya bukatun jama'a su zama karfin da ke tafiyar da harkokin birni, tana da ma'ana ta gama gari. Kamar yadda taken dindindin na taron, "Birnin Jama'a, Kirkirar Kyakkyawar Rayuwa Tare", ya bayyana, makasudin karshe na tafiyar da harkokin birni shi ne, kowane mazauni ya ji rayuwarsa ta ingantu. 

An gudanar da taron kasa kan batun kiwon lafiya a nan birnin Beijing, daga ranar 12 zuwa 13 ga watan nan. Kuma shugaban kasar Sin Xi Jinping ya halarci taron tare da gabatar da jawabi.  A cikin jawabin nasa shugaba Xi ya jaddada cewa, lokacin aiwatar da "shirin raya tattalin arziki da zamantakewar al’umma na shekaru biyar-biyar karo na 15", lokaci ne mai muhimmanci na cimma burin gina Sin mai lafiya nan zuwa shekarar 2035, kuma dole ne a nace ga bin hanyar ci gaban kiwon lafiya mai halayyar musamman ta Sin, da aiwatar da manufofin kiwon lafiya a sabon zamani, da kuma ingiza ci gaban ingantattun hidimomin kiwon lafiya. Kazalika, a karfafa matakin kula da lafiyar jama'a, da tabbatar da samun ci gaba na a zo a gani a wannan bangare.  Xi ya kuma nuna cewa, lafiyar jama'a wata muhimmiyar alama ce ta ci gaban al'umma da karfin kasa. Tun daga babban taron JKS karo na 18, kwamitin kolin JKS ya dora muhimmanci matuka kan aikin kiwon lafiyar jama'a, ya tsara manufofin aikin kiwon lafiya na sabon zamani, kana da yanke babbar shawara kan raya sha’anin tabbatar da lafiyar jama’ar Sin.  Ban da wannan kuma, ya ingiza gina tsarin kiwon lafiya da na maganin gargajiya, da na rigakafi da kula da cututtuka, da tsarin inshorar lafiya mafi girma a duniya, matakin da ya sa aikin kiwon lafiya ya samu gagaruman nasarori a kowane fanni.  (Amina Xu) 

Wasu mutanen Japan na daukar sabbin matakai masu cike da wayo da nufin jirkita tarihi. Bisa labarin da aka bayar kwanan nan, an ce, masu ra’ayin rikau na Japan na baiwa manyan tsarukan fasahar AI na duniya bayanai na jabu kan tarihin yakin duniya na 2, don tsarukan su rika fitar da amsoshi masu dauke da ra’ayoyin da ba su dace ba game da tarihi in an yi musu tambaya, inda suka bayyana harin da Japan ta kaiwa Sin a ranar 7 ga watan Yulin shekarar 1937 don yunkurin mamaye Sin a matsayin “Rikicin Soji Tsakanin Japan da Sin”, tare da bayyana “kisan kiyashin da sojojin Japan suka aikata a birnin Nanjing” a matsayin “Cin tura da Sin ta yi a Nanjing”. Har ila yau, sun gyara zaluncin mamayar da Japan ta yi wa yankin kudu maso gabashin Asiya a matsayin “Kula da Albarkatun yankunan kudu da Japan ta yi ”.  Daga gurbata littattafan tarihi, zuwa kirkirar bidiyon karya na fasahar AI, zuwa sanya guba cikin bayanai, masu ra’ayin rikau na Japan na ci gaba da yunkurin kirkirar sabbin hanyoyi don wanke tarihin mamayar da ta dade tana gudanarwa. Ba shakka, masu ra’ayin rikau na Japan ke aikata zambar ne don taimaka wa gwamnatin kasar wajen “farfado da karfin soja a Japan”, wanda hakan ya kara mai da “sabon salon ra’ayin nuna karfin soja” ya zama barazana ga duniya.  (Amina Xu) 

Yau Talata da rana, shugaban kasar Sin Xi Jinping, ya gana da shugaban majalisar ministocin kasar Togo Faure Essozimna Gnassingbe, wanda ke ziyara a kasar Sin.  Yayin tattaunawar, Xi Jinping ya gabatar da wasu ka’idoji 4 kan yadda bangarori daban-daban za su shiga a dama da su wajen warware manyan batutuwan da ke ci wa Afrika tuwo a kwarya.  Ka’ida ta farko ita ce, daukaka shugabancin Afrika, watau al’ummar nahiyar ne ya kamata su zama jigon jagorantar harkokinta.  Ka’ida ta biyu, daukaka adalci da gaskiya, watau bangarori masu ruwa da tsaki su kiyaye manufofi da ka’idojin kundin tsarin mulki na MDD da girmama cikakken ‘yanci da ikon kasashe masu ruwa da tsaki.  Ka’ida ta uku ita ce, inganta dakatar da rikice-rikice da neman zaman lafiya. Ya ce yaki da kakaba takunkumai daga bangare guda, ba za su warware rikice-rikice tsakanin kasa da kasa ba, don haka ya zama wajibi a nacewa martaba juna da tuntubar juna da neman yanayin da zai karbu ga kowa da hakuri da bambance-bambance da fahimta da hakuri da juna.   Sai ka’ida ta hudu, watau magance alamomi da tushen matsaloli. Ya ce ya kamata a yi kokarin mayar da hankali kan bukatun tsaro na gaggawa yayin da ake tsara hanyoyin samun ci gaba mai dorewa.   A nasa bangare, Faure Gnassingbe ya ce kasarsa ta amince da muhimman ka’idojin da shugaba Xi Jinping ya gabatar game da hanyoyin da bangarori daban-daban za su bi wajen warware manyan matsalolin Afrika, kuma yana jinjina wa muhimmiyar rawar da Sin ke takawa wajen tabbatar da zaman lafiya da kwanciyar hankalin duniya da magance kalubalen duniya bisa hadin gwiwa.  Baya ga haka, shugabannin kasashen biyu sun sanar da daga darajar dangantakar kasashen Sin da Togo zuwa ta hadin gwiwa bisa manyan tsare-tsare a dukkan fannoni. (Mai fassara: Fa’iza Mustapha) 

Yau Talata da rana, shugaban kasar Sin Xi Jinping ya gana da shugaban kasar Botswana Duma Gideon Boko, wanda ke ziyara a kasar Sin.  Yayin tattaunawar da suka yi, Xi Jinping ya gabatar da wasu shawarwari 4 na bunkasa hadin gwiwar hakar ma’adinai tsakanin Sin da Botswana da ma Sin da Afrika. Da farko, ya ce ya kamata a daukaka ka’idar cewa albarkatun Afrika, mallakin Afrika ne. Kuma a shirye Sin take ta gabatar da gogewarta, tare da taimaka wa kasashen Afrika tsara shirye-shiryen bunkasa aikin hakar ma’adinai da suka dace da yanayin kasashen nahiyar. Na biyu, a rungumi ra’ayin hadin gwiwa mai daidaito da muradu na moriyar juna. Ya ce Sin za ta ci gaba da karfafa gwiwar kamfanoninta su bunkasa ayyukansu da kai fasahohi masu kare muhalli da suka dace da yanayin nahiyar da inganta hadin gwiwar kasashe masu tasowa a bangaren raya aikin hakar ma’adinai.  Na uku, rungumar hanyar hadin gwiwa mai inganci. Ya ce Sin za ta ci gaba da ingiza sauye-sauye a hadin gwiwar hakar ma’adinai tsakaninta da Afrika, domin inganta ayyukan masana’antu da samar da sabbin dabarun samar da kudi masu araha da dorewa da goyon bayan tsarin zamanantar da Afrika ta hanyar hadin gwiwa mai inganci. Na hudu, daukaka muhallin hadin gwiwa mai adalci da bude kofa. Ya ce bai kamata albarkatun Afrika su zamo abun haifar da kiyayya tsakanin yankuna ba. Ya ce Sin tana maraba da kokari daga dukkan bangarori domin taimaka wa ci gaban nahiyar Afrika, kuma a shirye take ta hada hannu da bangaren Afrika din wajen samar da kyakkyawan yanayin da kamfanoni za su zuba jari da gudanar da ayyuka.  A nasa bangare, Duma Gideon Boko ya ce a shirye Botswana take ta hada hannu kut da kut da Sin, da daukaka cudanyar bangarori daban-daban da karfafa hadin kai tsakanin kasashe masu tasowa da inganta goyon baya da hadin gwiwa tsakanin Sin da Afrika.  Shugabannin biyu sun kuma sanar da daga darajar dangantakar kasashensu zuwa ta hadin gwiwa bisa manyan tsare-tsare a dukkan fannoni. (Mai fassara: Fa’iza Mustapha) 

Yayin da birane ke ci gaba da bunkasa a duniya, batutuwa kamar yawan al’umma, bukatun jama’a daban-daban, da kuma rarraba albarkatun jama’a suna kara bayyana bukatun da ake da su a harkokin shugabancin birane.   Sakamakon wani binciken da kafar CGTN ta babban rukunin gidajen rediyo da talabijin na Sin wato CMG, tare da jami’ar Renmin ta kasar Sin suka fitar, ta hannun kwalejin nazarin sadarwa ta duniya a sabon zamani, a tsakanin masu masu bayyana ra’ayoyi 7288 daga birane 25 a kasashe 21 ya nuna cewa, yawancin masu bayyana ra’ayoyin suna ganin cewa, ya kamata shugabancin birane ya fi mai da hankali kan biyan bukatun mazauna, da inganta ayyukan ba da hidimomin jama’a, da kuma kyautata hanyoyin karbar bukatun jama’a.  “Jama’a su gina birane, birane su hidimata wa jama’a” shi ne ra’ayin da ake bi wajen jagorantar ayyukan shugabancin birane a kasar Sin, kuma kashi 91.4% na masu bayyana ra’ayoyi a cikin binciken sun amince da wannan ra’ayi sosai. Bugu da kari, kashi 89% na masu bayyana ra’ayoyin sun yaba da ra’ayin kasar Sin na “Gina birane tare, shugabantar harkokin birane tare, da kuma rarraba fa’idoji tare”, kuma sun yaba da tsarin da mazauna, da kamfanoni, da kungiyoyin al’umma ke shiga cikin harkokin shugabancin birane.  Ban da haka kuma, kashi 90.5% na wadanda suka bayyana ra’ayoyin sun amince da kokarin da kasar Sin ta yi na inganta ingancin ayyukan ba da hidimomin jama’a bisa tsari mai kyau, tare da kira ga kasashen duniya su yi hadin gwiwa da kasar Sin a wannan fanni.(Safiyah Ma) 

Cikin karance-karance na a yau, na ga wani labari kan yadda shugaban kasar Sin Xi Jinping ya ziyarci wani asibitin a garin Shiye da ke lardin Jiangsu a watan Disamban 2014, inda ya zayyana hanyar bunkasa tsarin kiwon lafiya a yankunan karkara.  A cewarsa, “ya zama wajibi mu mayar da hankali kan tsarin kiwon lafiya a matakin yankuna, da kara samar da albarkatun kiwon lafiya ga yankunan karkara da tabbatar da daidaito wajen samun hidimomin lafiyar al’umma tsakanin yankunan karkara da birane.”  Hakika wannan labari ya tuna min da hidimar kiwon lafiya da Sin take bayarwa ga kasashe masu tasowa, musamman kasashenmu na Afrika. A ranar Asabar da ta gabata, asibitin tafi da gidanka na jirgin sojin ruwan Sin mai suna Auspicious Ark, ya bar kasar Guinea, bayan kammala ziyarar sada zumunta da ayyukan lafiya a wani bangare na shirin kiwon lafiya mai taken “Mission Harmony-2026.”  Yayin ziyarar, ya bayar da hidimomin lafiya, har da gudanar da tiyata da dama. Baya ga haka, ya tura tawagar jami’an lafiya masu bayar da horo zuwa asibitin abota na Sin da Guinea, domin musayar ilimi, da kuma gudanar da ayyukan kiwon lafiya a wani sansanin soji. Guinea ce kasa ta 3 da jirgin ya ziyarta a bana baya ga Mauritania da Senegal, karkashin shirin na “Mission Harmony-2026.”  Ziyarar jirgin, daban take da tawagogin da Sin ke turawa a kai a kai kasashen Afrika domin bayar da hidimomin kiwon lafiya, haka kuma, akwai asibitocin Sin da ke hadin gwiwa da takwarorinsu na Afrika, inda a ko da yaushe suke bayar da tallafin kayayyakin aiki da magunguna da ma bayar da horo.  Sanin ya kamata da kyakkyawan tsarin shugabanci irin na kasar Sin, bai tsaya kan al’ummominta kadai ba, tana kuma nuna wannan kyakkyawar dabi’a  da sanin ya kamata ga kasashe masu tasowa da ke hulda da ita, domin ganin al’ummominsu sun samu ingantaccen kiwon lafiya kamar yadda take ba al’ummominta.  Wannan yana kara nuna irin ra’ayin Sin na son ganin an samu ci gaba na bai daya, da samun al’ummar mai makoma ta bai daya ga daukacin bil adama, maimakon nuna son kai da fifita kanta, ko son ganin durkushewar wata kasa. Wannan shi ne salon taimako da duniya ke bukata, wanda ya kamata a ce manyan kasashen duniya suna aiwatar da shi.  Ba a bana kadai da jirgin Auspicious Ark ke ziyarar sada zumunta a nahiyar Afrika ba, tun a 2010 makamancin jirgin na Peace Ark ya fara gudanar da irin wannan aiki, inda ya ziyarci kasashe da dama na nahiyar Afrika. Kuma har zuwa yanzu, Sin ba ta taba gajiya ba, tana ci gaba da bayar da tallafi daidai gwargwadon iyawarta.   Tsarin hadin gwiwar Sin, shi ne wanda ke taba al’umma kai tsaye, bai wai mai tsayawa a fatar baki ba. Ba jama’ar birane ba, har al’ummomin yankunan karkarar Afrika sun san kasar Sin saboda irin gudummawar da take ci gaba da bayarwa wajen inganta rayuwarsu. Kuma wannan dalili shi ke kara kwarjini da karbuwar kasar a tsakanin kasashen Afrika, lamarin da zai kai ga samar da zuri’ar Sin da Afrika mai fahimta da aminci da kaunar juna. 

Mai magana da yawun ma’aikatar harkokin wajen Sin, Mao Ning ta bayyana cewa Sin tana da yankuna na musamman a cikin tekun dake gabashin tsibirin Taiwan, kuma ayyukan da Sin ke gudanarwa a cikin yankunan abu ne da ke karkashin ikon mallakarta. Ta kuma bayyana cewa ya kamata bangaren Amurka ya yi taka tsan-tsan kan batun Taiwan, kuma ya dauki matakai na zahiri don kare dangantakarsa da Sin, da kuma zaman lafiya da kwanciyar hankalin yankin.  Mao Ning ta bayyana haka ne a gun taron manema labarai na yau da kullum da aka gudanar yau Litinin.  Dangane da kalamai marasa tushe na “neman ’yancin kai ta hanyar dogaro da karfin waje” da shugaban yankin Taiwan Lai Ching-te ya yi kwanan nan, Mao Ning ta bayyana cewa duk abun da Lai ya furta ko aikata, ba zai iya canza makomar gazawar ayyukan “neman ’yancin kan Taiwan” ba.  Dangane da kalaman tsohon ministan harkokin wajen Japan cewa bangaren Japan ne da ya haifar da tabarbarewar dangantaka tsakaninsa da Sin, Mao Ning ta ce Sin ta bukaci ’yan siyasar Japan da su saurara kalamai na gaskiya da ake yi a cikin kasarsu.  Bugu da kari, dangane da harin da kungiyar Houthi ta Yemen ta kai wani filin jirgin sama na Saudiyya, Mao Ning ta ce Sin na ci gaba da adawa da hare-haren da ake kai wa fararen hula da kayayyakin more rayuwa, kuma tana kira ga bangarorin da abin ya shafa da su warware bambance-bambance da takaddama ta hanyar tattaunawa.(Safiyah Ma) 

Kakakin Ma’aikatar Cinikayya Ta Kasar Sin Ya Amsa Tambaya Dangane Da Matsayar Da Aka Cimma Tsakanin Sin Da Kungiyar EU A Kan Ababen Hawa  A yau Litinin ne kakakin ma’aikatar cinikayyar kasar Sin, ya amsa tambayoyi daga ‘yan jarida, dangane da matsayar da aka cimma tsakanin Sin da kungiyar tarayyar Turai ta EU, game da batun ababen hawa masu aiki da lantarki da masu aiki da lantarki da kuma fetur.  A cewar jami’in, Sin da EU sun shafe tsawon lokaci suna tattaunawa karkashin tsarin tuntuba game da cinikayya da zuba jari, sun kuma cimma wasu jerin matsaya, wadanda za su kyautata wanzar da daidaito da saita alakokin cinikayya tsakaninsu.   Kazalika, karkashin ka’idojin martaba juna da tuntuba bisa daidaito, sassan biyu sun gudanar da shawarwari sosai, dangane da cinikayyar ababen hawa masu aiki da lantarki da masu aiki da lantarki da kuma man fetur, sun daidaita jerin sabanin cinikayya da abubuwan da suke mayar da hankali a kansu, kana sun kauracewa sake ta’azzarar sa-in-sar cinikayya, wanda hakan ya samar da yanayi bisa daidaito, wanda za a iya hasashen makomarsa kuma mai dorewa, a fannin raya cinikayya da zuba jari domin moriyarsu, irin yanayin da zai kyautata daidaito, da saita tare da inganta ci gaban alakar tattalin arziki da cinikayyarsu. (Saminu Alhassan) 

An Nuna Fim Din “Bukatunku 2” Kan Manufar Karbar Korafe-Korafe Da Magance Matsaloli Nan Take A Beijing  An gudanar da bikin nuna fim din bayyana ainihin labarai mai taken “Bukatunku 2” a birnin Beijing jiya Lahadi, a matsayin daya daga cikin muhimman ayyukan da suka dace da taron gyare-gyaren manufar karbar korafe-korafe da magance matsaloli nan take na birnin Beijing na shekarar 2026.   Shekaru 2 da suka wuce, zangon fim din na farko wanda babban rukunin gidan radiyo da talabijin na kasar Sin CMG ya shirya, ya yi amfani da hirar da jama’a suka yi ta wayar tarho bisa tsarin karbar korafe-korafe ta waya, bisa lamba “12345” na Beijing, karkashin wannan jagoranci an nuna ayyukan kirkire-kirkire na birnin Beijing wajen zurfafa gyare-gyaren wannan aiki a mabambantan bangarori. A matsayin ci gaba, “Bukatunku 2” ya bayyana yadda ake yiwa wannan aiki gyare-gyare daga hangen kasa da kasa bisa labarai na zahiri.  Tun daga shekarar 2019, birnin Beijing ya yi amfani da layin musamman na tarho na hidimar jama’a mai lamba “12345”, don kaddamar da gyare-gyaren karbar korafe-korafe, da magence matsaloli nan take bisa kirkire-kirkire, ya kuma binciko sabuwar hanyar zamani ta tafiyar da harkokin babban birni bisa bukatun jama’a. Cikin shekaru 7, layin musamman na tarho na “12345” ya karbi bukatun jama’a kusan miliyan 200, kuma adadin cin nasarar magance matsaloli da jin dadin rayuwa duk sun zarce kaso 97 bisa dari. (Amina Xu)