Ƙungiyar Ƙwadago ta Ƙasa (NLC) ta yi watsi da martanin da Gwamnatin Tarayya ta mayar kan buƙatunta na neman ɗaukin rage raɗaɗin tattalin arziƙi da kuma fara shirin tattaunawar sabon mafi ƙarancin albashi ga ma’aikata. Wannan mataki ya jefa ƙasar cikin fargabar fuskantar gagarumar barazanar shiga yajin aiki da taƙaddamar masana’antu a yayin da wa’adin kwanaki 14 da ƙungiyar ta ɗibar wa gwamnati ke gabatowa ƙarshe.
Takaddamar ta samo asali ne biyo bayan matsayin da Ministan Ƙwadago da Samar da Aikin Yi, Dokta Muhammad Maigari Dingyadi, ya bayyana, inda ya ce tsarin mafi ƙarancin albashi na Naira 70,000 da Shugaba Bola Ahmed Tinubu ya sanya wa hannu a ranar 29 ga Yuli, 2024, ba zai cika wa’adin sake nazari ba sai a ranar 1 ga watan Yunin 2027 bisa tsarin doka na shekaru uku. Ministan ya bayyana cewa buɗe sabuwar tattaunawa a halin yanzu zai zama saɓa wa ƙa’ida da kuma kawo cikas ga tsarin dangantakar aiki, duk da cewa gwamnati na ci gaba da ƙoƙarin sauƙaƙa wa al’umma ta hanyar shirin motocin gas (CNG) da sauran tallafi.
A cikin wata wasiƙa mai kwanan wata 13 ga watan Oktoba, 2026, wadda Shugaban NLC, Kwamared Joe Ajaero ya aike wa ministan, ƙungiyar ta bayyana matsayin gwamnati a matsayin wanda ya saɓa wa doka, tattalin arziƙi, da adalci. NLC ta jaddada cewa hauhawar farashin kaya da faɗuwar darajar Naira sun mayar da ƙarin albashin Naira 70,000 tamkar “mafarki marar amfani”, inda ta buƙaci a kafa kwamiti (tripartite committee) tare da fara tattaunawar sabon tsari tun daga ranar 17 ga Oktoba, 2026, domin guje wa tara basussukan albashi ga ma’aikata a nan gaba.
Baya ga batun albashin, ƙungiyar ta nace kan wajabcin rage farashin man fetur zuwa yadda yake a daidai lokacin da aka sanya hannu kan dokar albashin a 2024, aiwatar da rangwamen haraji da aka cimma matsaya a kai tun a shekarar 2023, da kuma biyan alawus ɗin rage raɗaɗin tsadar rayuwa (wage awards) cikin gaggawa. Haka kuma, NLC ta buƙaci gwamnati ta aiwatar da dukkan sharuɗɗan yarjejeniyar da aka ƙulla da Haɗakar Ƙungiyoyin Ma’aikatan Kiwon Lafiya (JOHESU) da kuma Majalisar Tattaunawa ta Ma’aikatan Gwamnati (JPSNC).
A ƙarshe, NLC ta gargaɗi gwamnati cewa ci gaba da jan ƙafa barazana ce kai-tsaye ga rayuwar ma’aikatan Nijeriya, tana mai bayyana cewa buɗe kofa don tattaunawa ba tare da tsayayyen lokaci ko matakan agajin gaggawa ba ba zai haifar da ɗa mai ido ba. Yayin da ƙungiyar ba ta sanar da ranar shiga yajin aiki kai-tsaye a cikin wasiƙar ba, majiyoyi sun nuna cewa idan har wa’adin kwanaki 14 ya cika ba tare da an shawo kan buƙatun ma’aikatan ba, babu makawa za a fuskanci zaman ɗar-ɗar na yajin aiki a faɗin ƙasa.
