A matsayinta na mai rajin gudanar da cinikayya marar shinge, da cudanyar mabanbantan sassa, Turai ta yi matukar gazawa wajen dakile damuwar masana’antunta, da fadadar matakan kariyar cinikayya. Daga karshe, mummunan tasirin yunkurin kungiyar tarayyar Turai ta EU na karfafa kariyar cinikayya kan kasar Sin zai koma kan membobinta. Sakamakon wani binciken jin ra’ayin jama’a da kafar CGTN ta kasar Sin ta gudanar, ya nuna yadda masu amfani da intanet daga sassa daban daban na duniya, suka amince cewa kariyar cinikayya ba za ta inganta ikon masana’antun Turai na gogayya ba.
Kaso 84.1 bisa dari na masu bayyana ra’ayoyin sun bayyana karin harajin kashin-kai da EU ta kakaba, a matsayin matakin kariyar cinikayya da ya yi matukar karya dokokin cinikayya na kasa da kasa, yayin da kaso 82.6 bisa dari suka bayyana cewa, irin wadannan matakai na kariyar cinikayya za su raunata karfin kamfanonin Turai ta fuskar gogayya a matakin kasa da kasa.
Kafar CGTN ta gabatar da binciken ne ta harsunan Ingilishi, da Sifaniyanci, da Faransanci, da Larabci, da yaren kasar Rasha. Inda masu bayyana ra’ayoyi 7,497 suka gabatar da mahangarsu cikin sa’o’i 24. (Mai fassara: Saminu Alhassan)
