Jami’an gwamnati, da masana, da wakilan ‘yan kasuwa da ‘yan jarida sama da 300 daga kasashe 33 ne suka taru jiya Talata a Urumqi, babban birnin jihar Xinjiang ta Uygur mai cin gashin kanta dake arewa maso yammacin kasar Sin, domin tattaunawa kan kwarewar shugabanci a fannonin tsaro, da ci gaba, da kuma kyautata zamantakewar al’umma.
Wannan taro, wanda aka yi wa lakabi da “Taron Abota da Musaya na Xinjiang tare da Manyan Baki na Duniya,” ya kuma tattaro wakilai daga Kungiyar Hadin Gwiwa ta Shanghai (SCO) da Hukumar Kwadago ta Duniya (ILO) wuri guda. An gudanar da taron ne karkashin taken “Kwarewar Xinjiang Wajen Iya Shugabanci da Muhimmancinta a Matakin Duniya.”
Babban sakataren kungiyar SCO, Nurlan Yermekbayev, ya ce a yayin da ya ziyarci Xinjiang a lokuta da dama, ya ganewa idonsa irin manyan sauye-sauyen da aka samu a yankin.
Yermekbayev ya ce, hadin gwiwa tsakanin tsaro da tattalin arziki yana karfafa juna, da taimakawa wajen samar da yanayin dorewar musaya a tsakanin kasa da kasa da kuma hadin gwiwa a cikin gida. Ya kuma yi kira da a kara shimfida ayyuka masu alfanu wadanda za su iya samar da cin moriyar juna. (Abdulrazaq Yahuza Jere)
