Kwanan baya, wata wakiliyar kafar CMG ta yi hira da Madam Christine Lagarde, shugabar babban banki na tsakiya na nahiyar Turai, a birnin Bankok na kasar Thailand, inda Madam Lagarde ta jinjina wa kasar Sin bisa nasarar da ta samu a fannin rage talauci.
Yayin da Lagarde ta ambaci sakamakon da kasar Sin ta samu a fannin raya kasa, ta ce Sin ta yi kokarin daukar matakan rage talauci, bisa hadin gwiwar daukacin al’ummun kasar, inda ta fitar da daruruwan miliyoyin mutanen kasar daga kangin talauci. Hakan ya kasance babbar nasara mai matukar burgewa.
Ban da haka, Madam Lagarde ta kara da cewa, a bangaren tinkarar barazanar sauyawar yanayi a duniya, kasar Sin ta dora muhimmanci kan tsabtace iska da ruwa, da aikin tattara shara da tsarin bola-jari, ta yadda a wannan bangare ma ta samu gamsassun sakamako.
Sa’an nan, wani aikin da kasar Sin da kungiyar kasashen Turai (EU) suka yi a kwanan baya, shi ne gudanar da taro na 2 a karkashin tsarin tattaunawar Sin da EU kan harkokin ciniki da zuba jari a birnin Beijing na kasar Sin, inda bangarorin 2 suka cimma daidaito kan harkoki 16 masu nasaba da fannonin kayyade fitar da kayayyaki, da garam-bawul da ake yi a kungiyar ciniki ta duniya WTO, da cinikiyya da zuba jari, da dai makamantansu. Dangane da wannan taro, Madam Lagarde ta ce, sakamakon da aka samu wajen taron suna da ma’anar musamman, saboda sun shaida cewa ana iya gudanar da tattaunawa yadda ake bukata tsakanin bangarorin Sin da EU.
Madam Lagarde ta kara da cewa, dukkan bangarorin Sin da EU suna daukar matakai ne bisa muradin tabbatar da moriyarsu. Saboda haka, yayin da kasar Sin ke neman fitar da karin kayayyakinta zuwa ketare, za ta dora muhimmanci kan kasashen Turai, wadanda suke da wani babban kaso na manyan kasuwannin duniya.
A sa’i daya kuma, dimbin kamfanonin kasashen Turai suna zuba jari a kasar Sin, inda suka kafa rassansu, da kantunan sayar da kaya, gami da cibiyoyin kere-kere. Hakan ya shaida cewa, bangarorin Sin da EU suna da moriyar nau’in bai daya, kamar yadda Madam Lagarde ta bayyana. (Bello Wang)
