Bisa dagewarta ga bunkasa fasahar kirkire-kirkire, kasar Sin ta samu babban karin matsayi a mizanin jerin kasashen duniya masu dimbin fasahar kirkire-kirkire, daga matsayi na 34 a shekarar 2012 zuwa matsayi na 10 a karshen shekarar 2025. Ta samu wannan ci gaba ne bisa manyan nasarorin da ta samu a fagen kirkire-kirkiren kimiyya da fasaha wadanda hatta wasu manyan jaridu na kasashen duniya sun yi magana kan ci gaban da kasar ke samu a wannan fage kwanan baya.
A rahotannin da suka bayar na karshe-kashen shekarar 2025, kafofin watsa labarai sun yi magana a kan karfin kirkire-kirkiren kimiyya da fasaha na kasar Sin, inda daga cikin labarai da rahotanni da sharhohi guda 15,000 da kafofin watsa labarai na duniya 100 suka bayar game da kasar Sin, batun kirkirarriyar basira (AI) da kuma ci gaban fasaha su ne suka daukar hankali.
A rahoton da mujallar kimiyya da fasaha ta kasar Amurka ta wallafa dangane da manyan nasarorin da aka samu a 2025, gagarumin ci gaban da aka samu a fannin sabbin makamashi ne ya zamo kan gaba, inda aka nuna cewa, kasar Sin ce ta samu ci gaba mafi rinjaye wajen samar da kayayyakin sabbin makamashi, inda ta kera kimanin kaso 80 cikin dari na adadin kayayyakin makamashin hasken rana, da kaso 70 cikin dari na kayayyakin makamashin iska, kana da kaso 70 na baturan lithium a duniya. Kuma babban abin birgewa, ta samar da su ne a farashi mai saukin da babu na wata kasa da ya yi kusa da nata balle ya fi. Wannan ya sake fayyace aniyar kasar Sin ta samar da kyakkyawar makoma ga bil’adama ta bai-daya a duniya.
Kazalika, wani rahoton da jaridar The New York Times ta Amurka ta wallafa, ya yi magana a kan yawan motocin lantarki da kasar Sin ta kera wanda ya zarce na kowace kasa da tazarar gaske, inda hakan ke nuna yadda kamfanonin kasar Sin masu kera motocin suka samu ciniki da karbuwa daga masu saye duk da halin da ake ciki a yanayin kasa da kasa.
Ita ma a wata mukala da ta wallafa, mujallar The Economist ta yi batun irin ci gaban da kasar Sin take samu wajen zama kakkarfan ginshikin kirkire-kirkire na zamani, har ma ta ce, bunkasar da kasar Sin ke samu ta fuskar kere-keren fasahohi marasa shamaki musamman a bangaren motoci masu tuka kansu da sabbin magungunan cututtuka, ta nuna karfin kasar a fagen kirkire-kirkire na zamani.
Bugu da kari, jaridar kasar Saudiyya ta Al Riyadh ta ba da rahoton cewa, wasu biranen kasar Sin kamar Shenzhen, Suzhou da Hangzhou yanzu sun zamo masu kama da juna bisa kirkire-kirkire na zamani, sannan wani karin abun sha’awa shi ne, yadda kasar take amfani da fasahar AI wajen tsara zamantakewar birane da ke taimakawa jin dadin rayuwar al’umma.
Duka wadannan dai kyakkyawar shaida ce a kan ci gaban da kasar Sin ke samu a fagen kirkire-kirkire, kuma ga dukkan alamu sashen zai ci gaba da samun tagomashi a yayin da kasar ke kokarin fara aiwatar da shirin bunkasa ci gaban kasa da zamantakewar al’umma na shekaru biyar-biyar karo na 15 a sabuwar shekarar nan da muka shiga ta 2026. (Abdulrazaq Yahuza Jere)
