A dai dai lokacin da al’ummar Jihar Kogi ke tsammanin zuwar Shugaba Muhammadu Buhari jihar don kaddamar da wasu manyan ayyuka a yau, sai gashi an samu fashewar wani mai kama da bam wadda yayui sanadiyyar mutuwar mutum hudu nan take.
Wata majiya tace lamarin ya faru ne da misalin karfe 9 na safiyar yau Alhamis a kusa da kofar fadar mai martaba Ohinoyi na kasar Ebira, Alhaji (Dakta) Ado Ibrahim.
Shaidu sun ce bam din wadda tayi sanadiyar mutuwar mutum hudu har ila yau ta shafi kofar fadar mai martaba Ohinoyi na Okene
Ganau sun kara da cewa bam din ta lalata babura biyu .
An dai sa ran Shugaba Buhari zai kai ziyara garin Okenen ne don kaddamar da katafaren asibiti irin ta zamani da sauran ayyuka a sassa dabam dabam na Jihar wadda gwamnatin Yahaya Bello ta aiwatar.
Tuni dai Shugaba Buhari ya isa jihar ta Kogi inda ya kaddamar da dukkan ayyukan da gwamnatin Jihar ta gudanar.
Jami’an tsaro a yanzu sun killace daukacin wurin da lamarin ya auku kuma sun hana mutane da ababen hawa zirga zirga a wajen.
Duk kokarin da manema labarai suka yi na jin ta bakin mai magana da yawun rundunar yan sandar Jihar Kogi, SP Williams Aya ya faskara ganin cewa kiran lambar wayarsa taki shiga.
