Ofishin yada labarai na majalisar gudanarwar kasar Sin, ya gudanar da taron manema labarai a safiyar yau Laraba, inda hukumar kididdiga ta kasar ta fitar da bayanan tattalin arziki na rabin farkon shekarar nan ta 2026. Bayanan sun nuna cewa, a rabin farko na wannan shekara, tattalin arzikin kasar ya ci gaba da gudana cikin kwanciyar hankali duk da matsin lamba, inda samar da kayayyaki ya karu cikin sauri, kuma yanayin samar da guraben aikin yi ya gudana cikin kyakkyawan yanayi, kana farashin kayayyaki ya tashi kadan.
Har ila yau, alkaluman sun nuna yadda cinikin waje ya samu kyakkyawan ci gaba, kana sabbin karfin kirkire-kirkire suka bunkasa cikin sauri, kuma an samu ingantacciyar bunkasar rayuwar jama’a, yayin da karfin juriya ya samu ci gaba na a zo a gani. Bisa kididdiga ta matakin farko, jimillar GDP a rabin farko na shekarar ya kai yuan tiriliyan 69.5704, wanda ya karu da kashi 4.7% idan aka kwatanta da na kwatankwacin lokacin bara bisa la’akari da farashin da ba ya canzawa.
A rabin farko na shekarar nan, an samu karuwar amfanin gona mai armashi a lokacin bazara, kuma kiwon dabobbi ya samu ci gaba yadda ya kamata.
Kazalika, masana’antu sun samu karuwa cikin sauri, yayin da masana’antar kera kayan aiki, da masana’antar fasaha sun samu kyakkyawan ci gaba. A wannan wa’adi dai, ayyukan hidima sun karu ba tare da tangarda ba, kuma ci gaban ayyukan hidima na zamani ya bunkasa yadda ya kamata.
Bugu da kari, kasuwar sayayya ta ci gaba da fadada, yayin da tallace-tallacen ayyukan hidima suka karu cikin sauri. Kazalika, jimillar tallace-tallacen kayayyaki da hidimomi ta karu da kashi 2.7%, yayin da cinikayyar shige da fice ta karu cikin sauri, hakan ya sa tsarin ciniki na ci gaba da inganta. (Amina Xu)
