Wakilin dindindin na kasar Sin a MDD Sun Lei, ya yi kira da a kafa wani tsari na duniya na jagorantar harkokin da suka shafi muhimman ma’adinai, wanda zai kasance a bude, mai tafiya da kowa da tabbatar da adalci da daidaito da samar da moriyar juna, kuma mai tsafta da kare muhalli.
Sun Lei ya bayyana cewa, kasar Sin ta zama jagora kuma karfin da ke ingiza amfani da makamashi mai tsafta a duniya, haka kuma mai bayar da gudummuwa ta fuskar tsarin jagorantar harkokin muhimman ma’adinai.
Ya ce bisa daukaka falsafarta ta “Green is Gold” da ke jaddada darajar kare muhalli da tsaftar yanayi, kasar Sin na namijin kokari wajen inganta hadin kan kasa da kasa a bangaren muhimman ma’adinai.
Ya ce bisa amfani da karfinta na fasahohi da kyautata bangarorin haka da narkar da ma’adinai da ba tare da gurbata muhalli ba, kasar Sin tana samar da dabaru da mafita da ke zaman abun koyi ga kasashe masu tasowa da ke da arzikin ma’adinai.
Bugu da kari, ya ce a shirye Sin take, ta hada hannu da dukkan bangarori domin karfafa tsarin jagorantar harkokin muhimman ma’adinai da ke da muhimmanci ga sauyawa zuwa makamashi mai tsafta, da kuma hada hannu wajen samar da duniya mai tsafta da kyau da wadata. (Mai fassara: Fa’iza Mustapha)
