Gwamnan Jihar Gomb, Muhammadu Inuwa Yahaya ya umarci shugabannin kananan hukumomi 11 da ke jihar da su mika ragamar tafiyar da harkokin kananan hukumominsu ga sakatarorinsu.
Matakin na zuwa ne bayan rushe shugabannin kananan hukumomin, mataimakansu da kansiloli da gwamnan ya yi a sakamakon karewar wa’adin mulkinsu a ranar 21 ga watan Disamban 2022.
A wata sanarwar da sakataren Gwamnatin jihar Gombe, Farfesa Ibrahim Abubakar Njodi ya fitar, ya ce, “Sakamakon karewar wa’adin mulkin shugabannin kananan hukumomi, mataimakansu da kansiloli na jihar Gombe a ranar 21 ga watan Disamban 2022, Mai girma gwamnan Jihar Gombe, Muhammdu Inuwa Yahaya, (Dan Majen Gombe), ya umarci shugabannin kananan hukumomi 11 da ke barin gado da su mika ragamar tafiyar da harkokin kananan hukumominsu ga sakatarorinsu.”
Gwamnan daga bisani ya gode tare da jinjina wa kokarin shugabannin, mataimakinsu da kuma Kansiloli d suka bayar wajen cigaban jihar Gambe, sai ya musu fatan alkairi a rayuwarsu na nan gaba.
