Wani sabon rikicin shugabanci ya ɓarke a reshen Jam’iyyar Allied Peoples Movement (APM) na Jihar Bauchi, yayin da wani ɓangare na jam’iyyar ya sanar da tsige shugaban jam’iyyar na jihar, Auwal Isah, bisa zargin saɓa wa kundin tsarin mulkin jam’iyyar da rashin amincewa da salon jagorancinsa.
Sakataren wannan ɓangare na jam’iyyar, Mohammed Nasir Yahaya, ya bayyana hakan a wani taron manema labarai da ya gudanar tare da wasu shugabannin jam’iyyar a ranar Laraba. Ya ce sun kuma amince da naɗa Hon. Nasiru Nuru Marafa a matsayin shugaban riƙo na jam’iyyar a jihar.
Yahaya ya ce rikicin ya samo asali ne bayan sauya shekar Gwamnan Jihar Bauchi, Bala Mohammed, da wasu jami’an gwamnati zuwa APM, lamarin da ya haifar da saɓani kan yadda za a raba muƙaman shugabancin jam’iyyar tsakanin tsofaffin mambobi da sababbin waɗanda suka shigo.
Ya yi zargin cewa Isah, wanda ya jagoranci jam’iyyar tun shekarar 2018, ya sauya sunayen mambobin kwamitin zartarwa na jiha tare da shigar da wasu mutanen da ya ce ba sa cikin tsofaffin mambobin jam’iyyar, sai dai masu biyayya ga gwamnatin jihar da wasu ɓangarorin PDP.
Ya kuma zargi shugabancin jam’iyyar da amincewa da tsarin da zai bai wa gwamnatin jihar kashi 70 cikin 100 na muƙaman shugabanci, yayin da tsofaffin mambobin za su riƙe kashi 30 cikin 100.
A cewarsa, an kafa kwamitin sasanci domin warware saɓanin, amma an dakatar da ayyukansa bayan kwanaki huɗu. Ya ce duk da miƙa ƙorafe-ƙorafe ga shugabancin jam’iyyar na ƙasa da Hukumar Zaɓe Mai Zaman Kanta ta Ƙasa (INEC), ba a warware matsalar ba.
Yahaya ya ƙara da cewa sun sanar da INEC da shugabancin jam’iyyar na ƙasa a hukumance kan matakin tsige Isah. Ya kuma ce Gwamna Bala Mohammed ya buƙaci ɓangarorin da ke rikicin da su kiyaye zaman lafiya domin hana matsalar ta’azzara.
Sai dai wani ɓangare na jam’iyyar ya yi watsi da sanarwar tsige shugaban.
Sakataren yaɗa labaransa, Abdulshakur Danlami Mohammed, ya ƙalubalanci iƙirarin Yahaya na cewa shi ne sakataren jam’iyyar, yana mai cewa ba shi ne sakataren da jam’iyyar ta amince da shi ba.
Ko da yake bai musanta cewa waɗanda suka nuna rashin amincewa da Isah mambobin jam’iyyar ba ne, Mohammed ya ce za su mayar da martani yadda ya dace kan lamarin.
