Mataimakin firaministan kasar Sin Ding Xuexiang ya gana da direktan hukumar kare ikon mallakar fasaha ta duniya Daren Tang, jiya 27 ga wannan wata a nan birnin Beijing.
A yayin ganawar, Ding ya bayyana cewa, tabbatar da ikon mallakar fasaha zai tabbatar da damar yin kirkire-kirkire. A yayin aiwatar da shirin raya kasa na shekaru biyar-biyar karo na 15, kasar Sin za ta ci gaba da tabbatar da ikon mallakar fasaha da yin amfani da shi yadda ya kamata, da sa kaimi ga raya kasa ta hanyar mallakar fasaha, da nuna goyon baya ga raya kimiyya da fasaha, da kuma samun bunkasuwa mai inganci. Ya ce kasar Sin tana son kara hadin gwiwa da hukumar kare ikon mallakar fasaha ta duniya don samun karin nasarori a wannan fanni.
A nasa bangare, Daren Tang ya yaba wa aikin tabbatar da ikon mallakar fasaha da kasar Sin ta gudanar, inda ya ce hukumarsa tana son zurfafa hadin gwiwa da kasar Sin don kyautata tsarin ikon mallakar fasaha na duniya, da kuma sa kaimi ga yin kirkire-kirkiren kimiyya da fasaha da kuma bunkasuwar tattalin arziki baki daya. (Zainab Zhang)
Discussion about this post