Bana, shekara ce ta cika shekaru 90 da cimma nasarar wani kuduri na kishin kasa da ake wa lakabi da dogon tattaki na jar rundunar sojojin kasar Sin ta gwagwarmayar kwamunisanci. Tattaki ne da aka yi na tsawon kilomita 12,500 cikin shekaru biyu, wanda aka fara da dakarun da yawansu ya kai 206,000, amma guda 57,000 ne kacal suka yi nasarar isa wurin da aka kudurta zuwa.
Wannan tattaki ba labari ne kawai ba, abu ne da yake nuna imani da kuma jajircewa kan cimma wani kyakkyawan buri ba tare da tsoron sadaukarwa kowace iri ba ce, inda sojojin rundunar suka sha gwagwarmayar haye manyan rafuka, da hawan tsaunukan dusar kankara, da kungurman dazuzzuka tare da gwabza yaki da abokan gaba na cikin gida daga bangaren Kuomintang da kuma sojojin mamayar zalunci na kasar Japan. Jar rundunar sojin dake karkashin jagorancin jam’iyyar kwaminis ta kasar Sin ta yi wannan gwagwarmaya ce ba tare da makaman yaki na a-zo-a-gani ba ko kuma rundunar sojin sama mai ba ta kariya ko kuma wata takamaimiyar hanyar kawo musu kayayyakin aiki ba, illa tsantsagwaron ruhin juyin-juya-hali na kishin kasa da ke gudana a jinanen dakarunta.
A kokarinsa na fayyace ma’anar wannan tattaki, wani dan jarida na kasar Amurka, Edgar Snow, wanda ya kasance dan rahoton labarai na yammacin duniya na farko da ya leka sansanin dakarun na kwaminisanci har ya tattauna da wasu dakarun da suka yi wannan tattaki, ya rubuta a wani littafinsa mai suna “Red Star Over China” a shekarar 1937 cewa, ba gwargwamaya ce ta yakin soji ba kawai, amma wata kwarewa ce ta dan’adam da ta kunshi kwarin gwiwa, sanin yadda sabbin wurare suke, gano wani sabon ci gaba, sadaukarwa, nuna biyayya, da tsabagen jajircewa da sauransu.
Duk da cewa, an kammala tattakin tun a shekaru 90 da suka gabata wadda daga bisani aka sauya akalar manufarta daga dabarar soji kawai zuwa wata sabuwar alkibla da ta kai ga samun nasarar juyin-juya-halin Sinawa sakamakon taron Zunyi, amma har yanzu Sinawa suna ci gaba da raya ruhinta na jajircewa. Ana iya ganin misalan haka daga dukkan fannoni na raya ci gaban kasar a yau.
Tun daga kan shugabanni da masu binciken kimiyya da masana da malaman ilimi har zuwa kan masu gudanar da kananan ayyuka, ana dora kishin ci gaban kasa a kan komai. Wannan ya yi matukar taimaka wa kiyaye ci gaban kasar Sin a babban mataki, da hana cin amanar kasa tare da tabbatar da bin doka sau da kafa.
Kazalika, bisa yadda ake ci gaba da tunawa da wannan rana, Sinawa suna gadar da wannan ruhi ga zuri’o’insu na gaba, kamar yadda na ga wani bidiyo na wasu kananan yara daga wata makarantar reno ta kasar, suna kwatanta wani abu na jaruntar jar rundunar sojin kasar Sin ta hanyar wasanni. (Abdulrazaq Yahuza Jere)
