Kwamitin yaƙin neman zaɓen shugaban ƙasa na jam’iyyar ADC ya yi Allah-wadai da kama wasu mambobin ƙungiyar #TinubuMustGo a Maiduguri, Jihar Borno.
A cikin wata sanarwa da Daraktan Yaɗa Labarai da Hulɗa da Jama’a na kwamitin, Kola Ologbondiyan, ya fitar, ya zargi gwamnatin Jihar Borno da amfani da lamarin domin tsoratar da mutanen da ke adawa da Shugaba Bola Tinubu.
Ologbondiyan ya ce ’yan ƙasa na da ’yancin bayyana ra’ayoyinsu kan siyasa, yana mai cewa kalmomin “Tinubu Must Go” ra’ayin siyasa ne, kuma bai kamata a ɗauke su a matsayin laifi ba.
Ya kuma zargi wasu gwamnonin jihohi da ƙoƙarin faranta wa fadar shugaban ƙasa rai, maimakon mayar da hankali kan buƙatun talakawa.
Kwamitin ya yi kira ga Gwamna Babagana Zulum da ya gaggauta sakin waɗanda aka kama tare da tabbatar da tsaron lafiyarsu.
Haka kuma, ya buƙaci Ƙungiyar Tarayyar Afirka, Tarayyar Turai, Babban Ofishin Jakadancin Birtaniya da na Amurka da su sanya ido kan abin da ya bayyana a matsayin cin zarafin ’yan ƙasa.
ADC ta ce za ta ci gaba da goyon bayan shiga harkokin siyasa da kare haƙƙin ’yan ƙasa yayin da ake tunkarar babban zaɓen 2027.
