Hukumar EFCC ta kama wani ɗan kasuwa ɗan ƙasar Kamaru, Bekono Marc Eric, bisa zarginsa da hannu a damfarar kuɗi ta banki da ta kai Naira biliyan 1.5. An kama mutumin mai shekaru 47 ne a ranar 23 ga Afrilu, 2026 a yankin Ikorodu na jihar Legas.
A cewar EFCC, wanda ake zargin na cikin wata ƙungiyar masu aikata laifuka ta ƙetare iyakoki da ke da ƙwarewa wajen damfarar katin ATM, inda suke kai hari ga bankuna da kwastomomi masu manyan kuɗaɗe a asusunsu.
Hukumar ta bayyana cewa mambobin ƙungiyar kan buɗe asusun banki a Nijeriya, su samu katin ATM da lambobin sirri (PIN), sannan su yi tafiya zuwa ƙasashe makwabta domin aiwatar da damfarar kuɗi ta amfani da waɗannan bayanai.
EFCC ta ce tana ci gaba da bincike, kuma za a gurfanar da wanda ake zargin a gaban kotu da zarar an kammala binciken da ake yi a kansa.
