Hukumar Zaɓe Mai Zaman Kanta ta Ƙasa (INEC) ta bayyana cewa ɗan takarar gwamnan Jihar Kano, Abdulsalam Gwarzo, a ƙarƙashin jam’iyyar NDC, za ta dogara ne da hukuncin kotu kan shari’ar da ake yi game da sahihancin takararsa a zaɓen gwamna na 2027.
Wata majiya daga hukumar INEC ta shaida wa jaridar The Punch cewa hukumar ta ƙi amincewa da takarar Gwarzo ne dalilin wani umarnin wucin-gadi da Babbar Kotun Tarayya ta bayar, wanda hakan ya hana ta wallafa sunansa a jerin ƴan takarar. Majiyar ta ce da ba don wannan umarni na kotu ba, da Gwarzo ya samu damar shiga jerin sunayen ƴan takarar da aka amince da su.
Rahotannin sun bayyana cewa Gwarzo ya shigar da ƙara a kotu domin ƙalubalantar cire sunansa da na mataimakinsa, Rabiu Mustapha, daga jerin ƴan takarar gwamnan Kano. A cikin ƙarar da aka shigar ranar 20 ga Oktoba, 2026, ya nemi kotu ta ayyana cire sunayensu a matsayin wanda bai dace da doka ba, tare da umartar INEC ta amince da su a matsayin ƴan takarar NDC.
A ranar Alhamis, 29 ga Oktoba, INEC ta sanar da sakamakon nazarin ƙorafe-ƙorafen da jam’iyyun siyasa suka gabatar kan jerin sunayen ƴan takarar gwamna da na majalisun dokokin jihohi. Hukumar ta ce ta karɓi ƙorafe-ƙorafe 69 kan ƴan takarar gwamna daga jam’iyyu 12 a jihohi 26, inda ta amince da 41, yayin da ta yi watsi da 28. Haka kuma, ta karɓi ƙorafe-ƙorafe 61 kan ƴan takarar majalisun dokokin jihohi, inda ta amince da 25, ta kuma ƙi 36.
Hukumar ta danganta wasu matsalolin cire sunayen ƴan takara da rashin bin tanade-tanaden Dokar Zaɓe ta 2026, musamman wajabcin jam’iyyun siyasa su miƙa rajistar mambobinsu. Ta ce za ta wallafa sabon jerin sunayen ƴan takara bayan kammala nazarin ƙorafe-ƙorafen.
Don haka, makomar takarar Gwarzo za ta kasance ƙarƙashin abin da kotu za ta yanke kan shari’ar da ake yi.
