Yayin taron bita da nazari karo na 10 kan tallafawa harkokin ciniki da Kungiyar Ciniki ta Duniya ke gudanarwa, kasar Sin da Zambia da Rwanda sun gudanar da taron tattaunawa mai taken hadin gwiwa tsakanin Sin da Afrika domin hade ciniki da zuba jari da nufin habaka harkokin masana’antun Afrika.
Da yake jawabi a taron da aka gudanar a jiya Alhamis, a birnin Geneva na kasar Switzerland, mataimakin ministan kasuwanci na kasar Sin, Jiang Chenghua ya bayyana cewa, kasashen Afrika ba su da isasshen kaso a tagomashin da ake samu a harkokin cinikayyar kasa da kasa da masana’antu, don haka ya kamata su gaggauta bunkasa tattalin arziki da masana’antu ta hanyar dunkule harkokin cinikayya da zuba jari.
Chenghua ya ce, kasar Sin a shirye take ta ba da dabarun ayyukan raya kasa ga dukkannin abokan hulda, da kuma habaka hadin gwiwa bisa ajandar bunkasa ci gaba ta WTO, tare da tsuke gibin da ake da shi a harkokin ci gaba.Sin ta mikawa Kungiyar Ciniki ta Duniya daftarin shawarwari kan dunkule harkokin cinikayya da zuba jari, tare da yin maraba ga sauran kasashe mambobi domin tattauna batun.
wakilai da suka halarci taron sun shaida cewa, kasancewar Sin babbar kasa mai tasowa a duniya, a ko da yaushe tana kokarin aiwatar da babbar shawarar tabbatar da ci gaban duniya da ta gabatar, ta hanyar hada kasuwanni, da jari, da fasaha, da gogewarta, da albarkatu, da karfin ma’aikata, da damammakin ci gaba na kasashen Afirka.
Kazalika kasar Sin tana tallafawa Afrika wajen habaka hanyoyin neman ci gaban tattalin arziki da karfin kai, sannan tana ba da mafita kan yadda kasashen Afirka za su bunkasa harkokin masana’antunsu, da kuma yadda za a gina wata duniya mai wadatar bai daya don amfanar da kowa. (Suleiman Suleiman )
