Gwamnatin Tarayya ta bayyana cewa rangwamen farashin man fetur da kamfanin NNPC ya yi ba yana nufin an dawo da tallafin man fetur ba.
Ya jaddada cewa ba a amfani da kuɗin gwamnati wajen rage farashi.
Ministan Kuɗi kuma mai kula da tattalin arziƙin ƙasa, Taiwo Oyedele ne, ya bayyana hakan a cikin wata sanarwa da ya fitar a Abuja ranar Juma’a.
Ya ce NNPC ya rage ribar da yake samu daga sayar da man fetur ne domin yi wa jama’a rangwame, ba wai yana karɓar kuɗi daga gwamnati ba.
A cewarsa, tallafin man fetur yana nufin gwamnati ta yi amfani da kuɗaɗen jama’a wajen biyan wani ɓangare na kuɗin man da ’yan ƙasa za su saya.
Ya ce gwamnatin Tinubu ta kawo ƙarshen wannan tsarin ne a shekarar 2023, kuma ba ta da shirin dawo da shi.
Oyedele ya bayyana cewa NNPC na sayen man fetur daga matatar Dangote da sauran wurare a farashin kasuwa, amma ya rage ribar da yake samu na ɗan wani lokaci domin sayar da man a farashi mai sauƙi ga jama’a.
Ya ƙara da cewa wannan rangwame zai iya amfanar masu sayen mai da gwamnati, domin rage farashi zai kawo ƙarin kwastomomi.
Ministan ya kuma yi watsi da fargabar cewa rangwamen zai ƙara safarar man fetur zuwa maƙwabtan ƙasashe ba bisa ƙa’ida ba.
Ya ce ribar da dillalan man fetur za su samu ba ta kai kashi biyar cikin ɗari na farashin litar mai ba.
Oyedele ya ce sauran matakan da gwamnati ke ɗauka domin rage tsadar sufuri sun haɗa da faɗaɗa amfani da iskar gas ta CNG wajen sufuri, cire haraji da wasu kuɗaɗen shigo da man fetur.
Ya jaddada cewa an tsara waɗannan matakai ne domin rage wa ’yan Nijeriya tsadar rayuwa ba tare da dawo da tallafin man fetur ba.
