Ya zuwa jiya Asabar 25 ga watan nan na Yuli, kudaden shigar gidajen sinima na kasar Sin a zangon lokacin zafi na bana, ciki har da na tikitin da ake saya gabanin fitowar fina-finai, ya haura kudin kasar yuan biliyan 5.5, kwatankwacin dalar Amurka miliyan 812. Kazalika, jimillar adadin kudin shigar sashen na dukkanin shekarar nan ta 2026, ciki har da na tikitin da ake saya gabanin fitowar fina-finai ya haura yuan biliyan 21.2.
Cikin fina-finan cikin gida da suka haskaka sosai a wannan lokaci, akwai fim din zane mai motsi mai suna “All Wishes Come True”, wanda ya kunshi ma’anar tatsuniyar gargajiyar Sin ta “Eight Immortals”.
A wannan karo fim din ya fito da sabon salon ban dariya, da bulaguro mai nishadantarwa, da abubuwan kashe kwarkwatar ido na gargajiyar kasar Sin. Fin din ya zo da sabon salo mai gamsarwa ga ‘yan kallo na zamanin yau. Tun fara nuna shi a ranar 18 ga watan nan, fim din ya samu tagomashi a gidajen sinima, inda aka sayi tarin tikitin kallonsa tun gabanin ranar nunawa, ya kuma samar da kudi da suka zarta yuan miliyan 600.
Ana sa ran fim din na “All Wishes Come True” zai fita kasashen waje, ciki har da Australia, da New Zealand, da Amurka, da Canada da Birtaniya, tun daga tsakiyar watan Agusta dake tafe, kana daga bisani ya sake tsallakawa karin kasuwannin ketare.A zangon nuna fina-finai na lokacin zafi na bana, akwai fina-finan Sin da na kasashen ketare sama da 120 da aka fitar ko aka tsara fitarwa, wato tsakanin ranar 1 ga watan Yuni zuwa 31 ga watan Agusta.
Fina-finan dai sun kunshi masu dauke da labaran tarihi, da na ban dariya, da na fada, da zane mai motsi, da masu nuna kagaggun labaran kimiyya da fasaha. (Saminu Alhassan)
