Firaministan kasar Sin Li Qiang, ya jaddada bukatar ingiza hade fasahar kirkirarriyar basira ta AI da ayyukan sarrafa hajojin masana’antu na zamani. Li Qiang, wanda memba ne a ofishin siyasa na kwamitin kolin jam’iyyar Kwaminis ta kasar Sin, ya yi tsokacin ne a jiya Litinin, yayin wani rangadin aiki da ya gudanar a birnin Beijing na Sin.
A yayin ziyarar da ya kai wasu kamfanonin ayyukan kimiyya da fasaha, an yi masa karin bayani game da ci gaban kirkire-kirkiren fasahohi, da bunkasar masana’antu da aka samu a fannin mutum mutumin inji masu basira. Ya kuma ziyarci wuraren da ake aiwatar da sakamakon bincike da samar da ci gaban kamfanoni, da hajojin da ake samarwa bisa hakan a fannoni daban daban.
Sakamakon abubuwan da ya gani, Li Qiang ya ce mutum mutumin inji masu basira, sun zamo jigo na hade fasahohin AI da sarrafa hajoji ta fasahohin zamani. Li ya kuma yi kira da a wanzar da kokari wajen karfafa fannonin bincike na asali, da cimma nasarori a bangarorin fasaha na muhimman fannoni, kana a yi kokarin zakulo manyan dabaru na ci gajiyar fasahar mutum mutumin inji masu basira.
Jami’in ya ce sashen ci gaban masana’antar mutum mutumin inji masu basira na da fadin gaske, don haka kamata ya yi kasar Sin ta yi amfani da fifikonta wajen cin gajiyar hakan. Alal misali a matsayin babbar kasuwa, da wuri mai kunshe da dukkanin sassan sarrafawa da rarraba hajojin masana’antu, da wurin aiwatar da hidimomin sashen, kana ta yi kyakkyawan amfani da manufofi dake tallafawa cimma nasarar hakan. (Saminu Alhassan)
Discussion about this post