A yau Litinin, firaministan Sin Li Qiang, ya jagoranci wani taron nazari kan yanayin tattalin arziki, domin sauraron ra’ayoyi da shawarwarin masana da ‘yan kasuwa kan matakai na gaba na bunkasa tattalin arzikin kasar.
Yayin taron, Li Qiang ya bayyana cewa, tattalin arzikin Sin ya shiga cikakkiyar hanyar ci gaba mai inganci, kuma tallafin mai dorewa da yake samu a cikin gida ya kara karfi.
Ya kuma jaddada bukatar inganta sauyawa zuwa ga sabon karfin samar da hajoji ba tare da tangarda ba, da gaggauta mayar da ayyukan kere-kere a masana’antu zuwa masu amfani da fasahohin zamani, da hade ayyukan kere-kere na zamani da masana’antar bayar da hidimomi na zamani, da amfani da sabbin fasahohi kamar na kirkirarriyar basira a harkokin kasuwanci, da samar da sabbin masana’antu, da kuma lalubo sabbin sana’o’i da guraben aiki, domin tabbatar da daidaiton bangaren samar da aikin yi. (Mai fassara: Fa’iza Mustapha)
