Gwamna Bala Muhammad Abdulkadir na jihar Bauchi, ya sake nada Mukhtar Mohammed Gidado a matsayin babban mai ba shi shawara kan yada labarai da hulda jama’a.
A wasikar sake dawo da shi mukaminsa, wacce aka fitar ga jama’a a ranar Talata dauke da sanya hannun Danjuma Garba, babban sakataren sashin ayyukan komai-da-ruwanka a madadin sakataren gwamnatin jihar, ya ce, Gidado zai cigaba da zama da cigaba da gudanar da aiki a matsayin mashawarci a bangaren yada labarai wa gwamnan.
A cewar sanarwar, gwamnan ya dawo da kakakin nasa ne bisa la’akari da irin nasarorin da ya cimma, aiki tukuru, biyayya, himma da kwarewa a bangaren aiki.
“A kan hakan, ana tsammanin za ka ninka kokarinka wajen cigaba da gudanar da aikinka bisa kwarewa da sanin ya kamata domin tabbatar da sauke nauyin da ke kanka,” a cewar sanarwar.
Idan za ku tuna dai a ranar 25 ga watan Mayun 2023 ne gwamnan ya sallami dukkanin mambobin majalisar zartaswa ta jihar tare da dukkanin masu ba shi shawara manya da kanana tare da sauran masu rike da mukaman siyasa.
Hakan na zuwa ne bayan shiga zango na biyu da gwamnatinsa ta yi bayan sake samun nasarar dawowa a karo na biyu.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
